Spáð í árshitann í Reykjavík

Nú þegar októberhitinn liggur fyrir ætla ég aðeins að spá í hvert stefnir varðandi meðalhita ársins í Reykjavík. Opinber ársmeðalhiti í Reykjavík er ekki nema 4,3°C, en þá er miðað við árin 1961-1990 sem var frekar kalt tímabil. Síðustu 9 ár eða öll ár þessarar aldar hefur meðalhitinn hinsvegar alltaf verið yfir 5 gráðum – að meðaltali 5,5°C. Hlýjast var árið 2003 þegar meðalhitinn náði 6,1°C. Nokkur spenna er nú í gangi því fyrstu 10 mánuðir ársins 2010 eru nánast jafn hlýir og sömu mánuðir ársins 2003 þannig að ýmislegt getur gerst en það veltur á frammistöðu síðustu tveggja mánaðanna. Hér mun ég velta mér nánar upp úr því:

Ef nóvember og desember verða mjög kaldir, eða í stíl við það sem gerðist nokkrum sinnum á kalda tímabilinu 1965-1995 og segjum að meðalhitinn það sem eftir er árs verði -2°C, þá verður meðalhiti ársins 5,5°C. Það er samt sem áður prýðilegur ársmeðalhiti og í meðallagi miðað við síðustu 10 ár.

Raunhæfara er að segja að meðalhiti nóvember og desember verði 0,45°C, eða í meðallagi miðað við viðmiðunartímabilið 1961-1990. Reyndar eru meira en 10 ár síðan þessir mánuðir hafa verið svo svalir, en ef það verður raunin þá endar ármeðalhitinn í 5,9°C og árið samt með allra hlýjustu árum sem mælst hafa.

Raunhæfast af öllu hlýtur þó að miða við reynslu síðustu 10 ára þar sem meðalhiti nóvember og desember hefur verið 1,95°C.  Ef svo er þá mun árið 2010 enda í 6,1°C og jafna þar með árshitametið frá 2003.

Útfrá því er ljóst að til að ná nýju árshitameti þá þarf meðalhiti það sem eftir er ársins að vera yfir meðalhita síðustu 10 ára. Ævintýralegast væri svo ef hin miklu hlýindi nóvember og desembermánaða ársins 2002 skyldu endurtaka sig, en þá tvo mánuði var meðalhitinn 4,6°C. Með slíkum hlýindum endaði árið 2010 í 6,5°C sem væri meira en tveimur gráðum yfir opinberum ársmeðalhita.

- - - - -

Útfrá þessu má segja að árshitinn 2010 verði varla lægri en 5,5 stig og varla meiri en 6,5 stig. Miðað við svipaðan hita og síðustu 10 ár þá stefnir árið 2010 hraðbyri í mettöluna 6,1°C. Lítið þarf hinsvegar til að slá metið og því óhætt að segja ógnarspenna verði í loftinu næstu tvo mánuði nema nóvember taki upp á því að detta í kuldaköst.

Til frekari glöggvunar kemur hér svo línurit yfir meðalhitann í Reykjavík frá 1931. Græna línan sýnir hver meðalhitinn hefur verið á tímabilinu 1931-2009 (4,7°). Bleika sporaskjan lengst til hægri á svo að tákna hvar meðalhitinn 2010 mun líklegast enda.

Hiti yfir meðaltali í október

Athugasemdir

[Magnús Óskar Ingvarsson, 1.11.2010 kl. 23:25]

Góð grein hjá þér og fínar pælingar.

[Einar Sveinbjörnsson, 2.11.2010 kl. 23:10]

Mörg ef enn í þessu Emil !  Svo fremi að ekki verði mikil frávik þessa tvo síðustu mánuði stefnir í það að árið verði með þeim allra hlýjustu í Reykjavík.  Varfærin spá segir 5,6 til 6,0°C.

ESv

[Höskuldur Búi Jónsson, 2.11.2010 kl. 23:38]

Þetta verður vissulega spennandi :)

[Emil Hannes Valgeirsson, 3.11.2010 kl. 00:06]

Þá má kannski dusta rykið af misalvarlegum spádómum nokkurra spekinga hér á síðunni í byrjun árs.

Þar spáði Sigurður Þór árshita upp á 2,8 stig af sinni alkunnu bölsýni. Svatli var varfærinn og sagði 5,2 stig. Höski Búi var með bjartsýnisspá upp á 5,8 stig sem gæti ræst ef kalt verður framundan. Ég spáði í glannaskap 6,2 stigum (og íslausum norðurpól) en í raunsæisstíl nefndi ég einnig 5,4 stig, ég vil þó frekar halda mig við fyrri töluna.

Mjög ólíklegt held ég að meðalhitinn verði undir 5,8 stigum því ef ég reikna rétt þá þarf meðalhitinn að vera um eða undir frostmarki það sem eftir er árs.

[Sigurður Þór Guðjónsson, 3.11.2010 kl. 01:08]

Ég er bjartsýnn svartsýnismaður!

[Sveinn Atli Gunnarsson, 3.11.2010 kl. 08:38]

Ég hef verið hóflega varfærin..

[Höskuldur Búi Jónsson, 3.11.2010 kl. 10:21]

Var ég raunverulega raunsær?

[Emil Hannes Valgeirsson, 5.11.2010 kl. 09:31]

Höski, þú ert kannski ofurraunsær. Miðað við kuldatíðina núna er ég farinn að efast um að árið nái 6 stigum. En vetrarhlákurnar í desember eru eftir.