Íslensk náttúra séð ofan úr geimnum

Þessi magnaða mynd gæti í fljótu bragði verið abstrakt-málverk eftir einhvern listamanninn. En svo er nú ekki því þetta er nú bara íslensk náttúra séð ofan úr geimnum og er fengin af hinni ágætu landaskoðunarsíðu, Google-map. Sé einhver í vafa hvaðan myndin er þá skal það upplýst að hér er kominn efri hluti Skeiðarárjökuls sem rennur úr Vatnajökli og niður á Skeiðarársand.

Þarna á myndinni má sjá ýmislegt athyglisvert. Vatnið sem þarna sést vestur af skriðjöklinum er Grænalón en það myndast vegna þess að jökullinn stíflar dalinn þar undir svo vatnið safnast þar fyrir. Á vissu millibili þegar vatnsmagnið í lóninu er orðið nægilegt, lyftir það upp jöklinum svo að lónið tæmist, vatnið hleypur fram og veldur flóði í Súlu og Núpsvötnum. Þetta gerðist síðast í júlí 2006 eftir því sem ég best veit. Lónið hefur hefur farið minnkandi hin síðari ár vegna þynningar á jöklinum sem aftur veldur því að hlaupunum fjölgar og þau verða minni í hvert sinn.

Það er líka athyglisvert að skoða skriðjökulinn. En vegna nálægðar sinnar við hin afar eldvirku Grímsvötn þá eru ýmis gömul öskulög áberandi í jöklinum en þau koma í ljós þegar sem jökullinn skríður fram og bráðnar og mynda þetta fallega mynstur. Eitt öskulagið þarna er meira áberandi en önnur, ekki veit ég þó úr hvaða gosi það er. 

Athugasemdir

[Jón Agnar Ólason, 3.3.2008 kl. 23:03]

Glæsileg mynd, fróðlegur pistill. Kærar þakkir.

Kv. 

[Lára Hanna Einarsdóttir, 3.3.2008 kl. 23:07]

Náttúran sjálf er fallegasta listaverk sem til er...