Fín mynd af Holuhrauni á Nasa-vefnum

Mynd dagsins á vefnum NASA Earth Observatory er loftmynd af Holuhrauni tekin 3. janúar 2015 ásamt umfjöllun. Myndin er ekki alveg í raunlitum, en þó samt nokkuð eðlileg að sjá. Glóandi hraunelfur sjást vel næst gígnum en einnig er greinilegt að hraun streymir enn að jöðrum hraunbreiðunnar lengst í austri og norðri. Að hluta má gera ráð fyrir að hraunið flæði þangað undir storknuðu yfirborði. Kannski aldrei að vita nema við fáum þarna nýja og almennilega hraunhella eins og Surtshelli í Hallmundarhrauni. Til þess þarf þó hraunhrásin að tæmast að gosi loknu sem er ekki víst að gerist.

Í texta sem fylgir myndinni á NASA-vefnum eru upplýsingar fengnar frá Jarðvísindastofnun Háskólans, en margt af því hefur þegar komið fram hér í fjölmiðlum. Talað er um að flatarmálið sé 84 ferkílómetrar. Þykkt hraunsins er áætluð að meðaltali 14 metrar á vesturhluta hraunsins en um 10 metrar á austurhlutanum en alls er rúmmálið 1,1 ferkílómetrar sem nægir til að skilgreiningar á hrauninu sem flæðibasalt og ekki á hverjum degi sem menn geta fylgst með slíkum atburði.

Einnig er talað um minnkandi virkni í gosinu eða hægfara rénun. Rénunin fari þó minnkandi eftir því sem virknin minnkar þannig að gosið gæti haldið áfram í nokkurn tíma þótt virknin minnki. Dregið hefur einnig úr sigi öskjunnar undir Bárðarbungu eins og við þekkjum. Sigið var 80 cm á dag á upphafsstigum en er nú komið niður í 25 cm á dag. Skjálftavikni hefur að sama skapi minnkað.

Lesa má um þetta nánar hér: http://earthobservatory.nasa.gov/IOTD/view.php?id=85031&eocn=home&eoci=iotd_readmore

Sé myndin skoðuð nánar og smellt á hana á vefnum framkallast mun stærri mynd í góðri upplausn og spannar snævi þakið hálendið allt um kring svo sem Öskjusvæðið, norðurhluta Vatnajökuls og allt að Hálslóni í austri. Myndin sem hér fylgir er heldur léttari en orginalinn sem finna má á slóðinni hér að neðan: (Ath. að vegna hárrar upplausnar gæti tekið smá tíma að kalla fram myndina) http://eoimages.gsfc.nasa.gov/images/imagerecords/85000/85031/holuhraun_oli_2015003_swir_lrg.jpg

 

 

 

Athugasemdir

[Gunnar Th. Gunnarsson, 9.1.2015 kl. 13:06]

Þetta svæði gæti orðið sérlega áhugaverður ferðamannastaður þegar þessu líkur. Ætli verði leyft að gera vegslóða þvert yfir hraunið svo fólk eigi auðveldara með að sjá hraunjaðarinn beggja megin?

Ég bíst við að hávær hópur mótmæli því 

[Emil Hannes Valgeirsson, 9.1.2015 kl. 13:30]

Nei það verður sennilega alveg harðbannað að leggja vegarslóða yfir hraunið, en kannski verða þó gönguslóðar. Gígarnir eru síðan ekki langt frá hraunjaðrinum í þægilegu göngufæri. En svo er spurning hversu aðgengilegt verður að hrauninu á sumrin þegar jökuláin flýtur meðfram jöðrunum á báða vegu.

[Gunnar Th. Gunnarsson, 9.1.2015 kl. 15:11]

Rétt, spennandi að sjá hvernig þetta mun líta út þegar þessu er lokið. 

Mér finnst vegslóði spennandi hugmynd, ekki geta allir gengið.

Árnar, austan og vestanmegin eru ekki mjög vatnsmiklar þarna, er það? Spurning hvort hægt verði að gera göngubrú yfir, jafnvel á fleiri en einum stað..