Staðan á hnattræna mánaðarhitasúluritinu

Fyrr á árinu setti ég upp súlurit sem sýndi hnattrænan meðalhita mánaðanna og í hvað gæti stefnt með meðalhita ársins. Eins og  lofað var þé kemur hér uppfærsla sem sýnir stöðuna eftir 7 fyrstu mánuði ársins. Tölurnar sem unnið er eftir eru frá Nasa-Giss sem er ein þeirra stofnana sem halda bókhald um hitafar jarðar. Svo maður útskýri aðeins þá standa Bláu súlurnar á myndinni fyrir meðalhita hvers mánaðar síðustu 10 ár. Rauðu súlurnar sýna meðalhita mánaðanna ársins í fyrra, 2014, sem endaði sem hlýjasta árið frá upphafi mælinga. Að vísu með minnsta mögulega mun. Fjólubláu súlurnar sýna síðan þá mánuði sem liðnir eru af árinu 2015. Á súlunum fjórum lengst til hægri er árshitinn tekinn saman. Tónuðu súlurnar þar segja til um hvert gæti stefnt með árshitann eftir því hvort restin af árinu verður í samræmi við meðalhita sl. 10 ára eða í samræmi við metárið í fyrra. Tekið skal fram að tölurnar eru ekki eiginlegur meðalhiti, heldur frávik frá meðaltali eins og venjan er þegar rýnt er í hnattrænan hita. Nánari bollaleggingar eru undir mynd.

Eins og sjá má þá byrjaði árið mjög hlýtt á heimsvísu hvort sem borið er saman við sl. 10 ár eða 2014. Næstu tvo mánuði var meðalhitinn lægri en árið 2014 en síðustu tveir mánuðir eru hlýrri og reyndar eru báðir þeir hlýjustu miðað við sömu mánuði fyrri ára í gagnaröð Nasa-Giss. Samanlagt er þetta heitasta byrjun á ári frá upphafi mælinga eins og komið hefur fram í fréttum. Það er spurning hvort nokkur spenna sé í þessu lengur enda þykir mjög líklegt að árið 2015 verði það hlýjasta á jörðinni frá upphafi mælinga hvort sem mönnum líkar betur eða verr. Öflugt El-Nino ástand er enn að færa sig upp á skaftið í Kyrrahafinu og má því búast við áframhaldandi hlýindum frekar en að þau gangi til baka.

En þá að spádómssúlunum lengst til hægri. Með því að reikna framhald ársins af hógværð út frá meðaltali síðustu 10 ára fæst árshitinn +0,76°C sem með herkjum slær út methitaárið 2014. Verði meðalhitinn það sem eftir er jafnhár árinu í fyrra fer meðalhitinn hinsvegar upp í 0,81°C sem væri afgerandi hlýjasta árið á heimsvísu. Það má hafa í huga að september og október 2014 voru báðir metmánuðir hvað hlýindi varðar þannig að það er ekki við neina aukvisa að eiga við.

Það má auðvitað alltaf velta fyrir sér áreiðanleika svona hnattrænna hitagagna enda sýnist sitt hverjum. Nasa-Giss notast við gögn sem gjarnan hafa verið leiðrétt og þeir fylla upp í eyður með sínum aðferðum. Þetta tekst auðvitað misvel og stundum illa, eins og í tilfelli Reykjavíkurhitans sem skeptískir útlendingar nota stundum sem dæmi. Aðrar stofnanir sem taka saman heimshitann nota aðrar aðferðir eins og t.d. Breska Veðurstofan í samvinnu við Austur-Anglíuháskóla (HadCRUD-gagnaröðin) Þar notast menn við óleiðrétt frumgögn og reyna ekki að fylla upp í mælingaeyður strjálbýlla svæða. Bretarnir eru dálítið lengur en Kanarnir að taka þetta saman en fyrstu 6 mánuðirnir liggja þó fyrir og skemmst frá því að segja að árið 2015 stefnir einnig í að verða hlýjasta árið samkvæmt gögnum HadCrud, allavega eru samkvæmt þeim, 6 fyrstu mánuðir ársins 2015 afgerandi þeir hlýjustu frá upphafi mælinga.

Þetta á allt við mælingar á yfirborðshita jarðar. Svo má auðvitað minnast á gervitunglagögn sem mæla hitann í lofthjúpi jarðar með mjög óbeinum hætti þar sem lögð er áhersla á neðri hluta lofthjúps fremur en yfirborð. Þar uppi er reyndar ekkert metár á ferðinni, hvurnig sem stendur á því. Gervitunglamælingar munu þó ekki vera lausar við vandamál og krefjast ýmissa flókinna leiðréttinga. Skýringin á mismunandi niðurstöðum gervitunglagagna og athugana á jörðu niðri þurfa þó ekki að liggja í gölluðum aðferðum annars hvors enda ekki verið að mæla það sama.

Gagnaröð NASA-Giss má sjá hér: http://data.giss.nasa.gov/gistemp/tabledata_v3/GLB.Ts+dSST.txt

HadCRUD gagnaröðin er hér: http://www.cru.uea.ac.uk/cru/data/temperature/HadCRUT4-gl.dat

Athugasemdir

[Ágúst H Bjarnason, 22.8.2015 kl. 11:22]

Sæll Emil.

Í hverjum mánuði gefur Ole Humlum prófessor við Oslóarháskóla út yfirlit um veðurfar heimsins. Það nýjasta fyrir júlímánuð má nálgast ókeypis hér:

http://www.climate4you.com/Text/Climate4you_July_2015.pdf

 

Það vekur athygli að hann er farinn að gæðaflokka mæligögn.

Í fyrsta flokk og með mestu gæðum eru mæligögn um lofthita frá gervihnöttum, UAH og RSS.

Í öðrum flokk eru mæligögn frá Bresku veðurstofunni, HadCRUT.

Í þriðja flokk eru mæligögn frá bandarísku NCDC og GISS, en þar á bæ eru menn af einhverjum ástæðum mjög ófeimnir við að "lagfæra" og breyta eldri gögnum.

Nánar í fráttabréfinu.

 

Úrklippa:

"...All interested in climate science should gratefully
acknowledge the big efforts put into maintaining all
temperature databases referred to in the present
newsletter. At the same time, however, it is also
realistic to understand that all temperature records
cannot be of equal scientific quality. The simple fact
that they to some degree differ clearly signals that
they are not all correct.

On this background, and for practical reasons,
Climate4you has decided to operate with three
quality classes (1-3) for global temperature records,
with 1 representing the highest quality level:

Quality class 1: The satellite records (UAH and RSS).
Quality class 2: The HadCRUT surface record.
Quality class 3: The NCDC and GISS surface records. 

[Emil Hannes Valgeirsson, 22.8.2015 kl. 13:25]

Þessi gæðaflokkun Humlums virðist gera ráð fyrir því að eftir því sem meira er lagfært þeim mun verri sé útkoman. Það gæti átt við í einhverjum tilfellum en alla jafna þá hljóta menn að lagfæra gögn til að gera þau betri, nema menn vilja endilega horfa á allar lagfæringar með tortryggnisgleraugum.

Gervitunglamælingar eru góðar að því leyti að þær skanna jafnt allan hnöttinn fyrir utan pólasvæðin. Þótt þarna sé á ferð mikil hátækni þá hafa verið ýmis vandamál og skekkjur sem þurft hefur að lagfæra og uppfæra, t.d. vegna þess að gervitungl úreldast og vilja missa hæð með tíma auk þess sem talsverð samræmingarvinna þarf að eiga sér stað milli gervitungla. UAH-gervitunglagögnin heita t.d. nú Version 6.0 sem segir sína sögu. Síðasta uppfærsla var gerð nú í sumar sem fólst í því að lækka hitatölur síðustu ára til samræmis við gögn RSS, en eins og við vitum þá teljast Alabamamennrinir hjá UAH til efasemdamanna um hlýnun af mannavöldum.

Ekki að það sé endilega ástæða leiðréttinaganna UAH en vekur samt spurningar í ljósi þess sem Roy Spencer hjá UAH sagði sjálfur árið 2011 á meðan version 5,0 var enn í notkun:

"my UAH cohort and boss John Christy, who does the detailed matching between satellites, is pretty convinced that the RSS data is undergoing spurious cooling because RSS is still using the old NOAA-15 satellite which has a decaying orbit, to which they are then applying a diurnal cycle drift correction based upon a climate model, which does not quite match reality. We have not used NOAA-15 for trend information in years ... ;we use the NASA Aqua AMSU, since that satellite carries extra fuel to maintain a precise orbit"

Sjá: On the Divergence Between the UAH and RSS Global Temperature Records

Gervitunglagögn eru því ekki eins einföld og áreiðanleg og af látið auk þess sem þau eru ekki að mæla yfirborðshita jarðar heldur lofthjúpinn fyrir ofan. Það eitt og sér gæti útskýrt muninn á þeim og athugunum á jörðu niðri.

[Höskuldur Búi Jónsson, 22.8.2015 kl. 21:52]

Jamm UAH og RSS hentar þeim sem afneita hnattrænni hlýnun... allavega meðan þær tölur sýna minni hlýnun en hinar ;)