Hlýjasti áratugurinn

Það þarf eitthvað mikið til ef þessi fyrsti áratugur aldarinnar verði ekki sá hlýjasti í Reykjavík síðan mælingar hófust. Meðalhitinn í Reykjavík árið 2007 var 5,5 °C og er þetta þar með sjöunda árið í röð með meðalhita yfir 5 gráðum. Það hefur ekki gerst frá upphafi mælinga að svona mörg hlý ár hafa komið samfleytt, og er það í samræmi við þá hitaaukningu sem orðið hefur á landinu og víðar eins og frægt er. Mest munar um hitann metárið 2003 með árshita upp á 6,1°C. Meðalhitinn í Reykjavík þau sjö ár sem liðin eru af þessari öld er einnig 5,5 gráður sem er 1,2 gráðum yfir meðaltali áranna 1961-90 sem er það tímabil sem núgildandi meðaltöl miða við. Það er þó rétt að hafa í huga að það var frekar kalt tímabil. 
Það er alveg greinilegt að hlýindin það sem af er þessari öld eru mjög sérstök enda um hálfri gráðu hlýrra en var á hinu margrómaða hlýja tímabili um miðja síðustu öld. Stóra spurningin er hvort þetta er eitthvað sem er komið til að vera eða er þetta bara hitasveifla sem mun ganga til baka? Það verður fróðlegt að vita hvenær meðalhitinn fer næst undir 5 gráður í Reykjavík, ef það mun þá yfirleitt gerast á okkar tímum.

Myndin hér að ofan sýnir meðalhita hvers áratugar frá 1931 í Reykjavík og tvö 30 ára meðaltöl þar á undan til ársins 1871 (hef ekki upplýsingar um hita hvers árs það tímabil). Til samanburðar er svo meðalhitinn það sem af er þessum áratug.

Athugasemdir

[Sigurður Þór Guðjónsson, 30.12.2007 kl. 00:07]

Áratugurinn 1998-2007 ER hlýjasti áratugur í Reykjavík frá upphafi mælinga.

[Emil Hannes Valgeirsson, 30.12.2007 kl. 00:38]

Jú mikið rétt, 1998-2007 er hlýjasti áratugurinn, en hann er ekki fyrsti áratugur aldarinnar eins og ég er að miða við hér.

[Lára Hanna Einarsdóttir, 31.12.2007 kl. 00:36]

Þetta var fróðlegt og gaman að sjá samanburð áratuganna. Þessi fyrsti áratugur aldarinnar verður án efa sá hlýjasti frá upphafi mælinga. Það þarf eitthvað mikið að gerast til að það klikki.

Gleðilegt ár annars og takk fyrir fróðlega pistla.