Hvernig kemur Esjan undan vetri?

Síðustu þrjú ár hef ég tekið ljósmynd af Esjunni frá sama sjónarhorni í fyrstu vikunni í apríl. Þegar teknar eru myndir svona með árs millibili er tilvalið að gera samanburð á snjóalögum en um þetta leiti ársins má gera ráð fyrir að ekki bæti í snjóinn í fjallinu að ráði og bráðnunartími snjóskaflanna hefjist fyrir alvöru. Það þarf ekkert koma á óvart að eftir þennan vetur er meiri snjór í Esjunni en undanfarin ár en suðurhlíðar Esjunnar eru reyndar ekki snjóþungt svæði svona yfirleitt. Frá árinu 2001 hafa allir snjóskaflar í Esjunni sem sjáanlegir eru frá borginni horfið á sumrin enda hafa öll ár þessar aldar verið hlý. Nú er bara spurning hvað gerist á þessu ári, er þetta nægilegur snjór til að lifa af sumarið?

Ég hef merkt inná síðustu myndina þá staði þar sem snjóskaflar í Esjunni lifa lengst. Til vinstri er skafl vestur undan Kerhólakambi sem er mjög lífseigur á sumrin þótt hann sé ekki stór og í kassanum til hægri þar sem er Gunnlaugsskarð eru nokkrir skaflar sem bráðna seint eða jafnvel ekki á sumrin.

 

Athugasemdir

[Sigurður Þór Guðjónsson, 7.4.2008 kl. 10:16]

Þettaætti nú allt að bráðna ef sumarhlýindi verða álíka og þau hafa verið síðustu ár.

[Emil Hannes Valgeirsson, 7.4.2008 kl. 12:02]

Ég giska reyndar á að síðustu skaflarnir hverfi ekki fyrr en seint í september. Veltur þó á sumrinu.

[Ágúst H Bjarnason, 7.4.2008 kl. 15:48]

Það verður fróðlegt að fylgjast með skaflinum í Gunnlaugsskarði...

[Lára Hanna Einarsdóttir, 8.4.2008 kl. 01:53]

Ég hef fylgst með þessu árum saman án þess þó að taka svona myndir. Gaman að þessu!