Bruce Springsteen - Born to Run

Myndband mánaðarins hjá mér að þessu sinni er lagið Born to run með Bruce Springsteen. Það kom upphaflega út á samnefndri plötu árið 1975, en er hér flutt á tónleikum. Ég veit ekki hvaðan upptakan er, hún er allavega nýleg, en Bruce og félagar hafa verið á mikilli tónleikareisu undanfarið. Sumir segja að þetta sé eitt besta rokklag allra tíma og ef svo er þá mótmæli ég því ekki. Bruce Springsteen dyggilega studdur af E-street bandinu færði rokkið niður á jörðina og var mótvægi við allt glysið og tilgerðarlegheitin sem einkenndi bransann á sínum tíma.

Bruce Springsteen og The E-street band náði að búa til stórt sánd eins og það er kallað, saxafónleikarinn Clarence Clemons (The Big Man) á þar sinn þátt og lífgaði uppá sviðið sem og gítarleikarinn Steven Van Zandt sem hefur gert það gott í leiklistini í hlutverki mafíubófans Silvio Dante í Sopranos-þáttunum.

Í öðrum frábærum sjónvarpsþáttum Saga Rokksins sem hafa verið í sýningu á RÚV undanfarið, lenti Bruce í flokknum „leikvangarokkari“, en sú skilgreining á vel við kappann enda greinilegt að hann nýtur sín vel á stóru sviði í öllum látunum. En Bruce Springsteen er ekki bara innantómur rokkhundur eins og sumir gætu haldið, hann er líka fínn texta- og lagahöfundur – einskonar rödd hins vinnandi alþýðumanns sem á sínar vonir og þrár, og stundum dálítið brostnar vonir.

Bruce Springsteen og E-Street bandið eins og það birtist á umslagi plötunnar The River sem kom út árið 1980.

Athugasemdir

[Lára Hanna Einarsdóttir, 30.6.2008 kl. 21:31]

Bruce er flottur - en síðasti pistill og kortið samt miklu flottara! 

[Emil Hannes Valgeirsson, 30.6.2008 kl. 23:03]

„Mætti ég frekar biðja um rok og ró heldur en rokk og ról“ sagði Böddi í bókinnni Rokland eftir H.H. Þetta segir okkur kannski að ekkert slær út veðurfregnir, jafnvel ekki besta rokklag allra tíma. En ég mátti samt til að koma honum Brúsa að.

[Lára Hanna Einarsdóttir, 30.6.2008 kl. 23:05]

Það er ágætt að brjóta upp bloggið efnislega endrum og eins... ég geri það stundum. 

[Siggi (IP-tala skráð) 3.7.2008 kl. 13:06]

Þessi upptaka er frá New York 2001, þegar E-Street bandið kom saman aftur.

[Emil Hannes Valgeirsson, 3.7.2008 kl. 15:08]

2001, þar höfum við það.