Síðasta bloggfærsla ársins

Hið stórkostlega ár 2008 er um það bil að syngja sitt síðasta og af því tilefni ætla ég ekki að fjalla um neitt sem orð er á gerandi sjálfsagt til mikilla vonbrigða fyrir þá sem von hafa átt á einhverju stórkostlegu um gang himintunglanna eða stöðu mannsins í eilífðinni. En allt slíkt verður að bíða til næsta árs en þá má t.d. eiga von á veðuruppgjörum fyrir liðið ár þegar lokaupplýsingar um það liggja fyrir. Veðrið er annars eitt af meginviðfangsefnum þessarar síðu enda hef ég fylgst náið með veðrinu í yfir 20 ár með því að halda úti veðurdagbók en þannig hef ég smám saman öðlast ágæta þekkingu á því fyrirbæri sem veðrið er. Kannski ætti ég einhvern daginn að birta svo sem eins og einn mánuð úr þessari veðurbók. Það held ég að sé verða dálítið merkileg bók, þótt ég segi sjálfur frá.

Ég hef líka lengi haft áhuga á jarðfræði allskonar en þeim fræðum kynntist ég áður en ég fór að grúska í veðrinu. Jarðfræðin er hins vegar ekki eins lifandi fræði því þar gerast hlutirnir mun hægar fyrir sig en í veðrinu. Hver dagur í veðrinu er svona svipaður og þúsund ár í jarðfræðinni. Það má semsagt eiga von á einhverjum jarðfræðiskrifum á næstunni, hvort sem það tengist líðandi stund eða ekki.

Hvað varðar ástandsskrif eins og flestallar bloggsíður eru undirlagðar af þá ætla ég áfram að standa utan við allt svoleiðis eins og ekkert hafi í skorist. Þögn er þó ekki endilega sama og samþykki, þetta snýst bara um ritstjórnarstefnu hjá mér og henni skal framfylgt hvað sem á dynur. Ég hef þó einstaka sinnum minnst á þetta bakslag sem hefur orðið á góðærinu og mætti kalla einhverskonar harðindi. Þar eru vissulega sumir í hlutverki sökudólga á meðan aðrir og reyndar flestir eru fórnarlömb. Erfitt getur verið að átta sig á hverjir eru í rauninni sekir og hverjir saklausir en eins og gengur og gerist í réttarkerfinu þá eru bæði þolendur og gerendur vanhæfir til að fella þá dóma.

En svo er myndlistin og listasagan alltaf áhugavert umfjöllunarefni en ólíkt náttúrfræðunum þar sem ég er bara menntaskólaður eða sjálflærður, þá hef ég allavega próf frá æðri menntastofnun í sjónmenntum og listasögu. Tilvalið er einmitt að enda þennan síðasta pistil ársins á málverki frá árinu 1568, málað af Flæmingjanum Peter Bruegel, stundum nefndur bænda-Bruegel. Myndefnið vísar í orð Krists í biblíunni og hefur víðtækar skýrskotanir: „Ef blindur leiðir blindan, falla báðir í gryfju“ (Mattheus 15:14).

Athugasemdir

[Sigurður Þór Guðjónsson, 31.12.2008 kl. 10:20]

Ætli ég sé ekki með mína síðustu bloggfærslu yfirleitt ef blog.is ætlar að neyða upp á mig nafni sem er ekki mitt eigið. Það kemur í ljós í nótt. En ég óska þér gleðilegs árs með blíðum og hitabylgjum og einu og einu illviðri og þakka veðurbloggfylgdina á þessu ári sem er að líða.

[Lára Hanna Einarsdóttir, 1.1.2009 kl. 20:27]

Gleðilegt ár, Emil og takk fyrir bloggvináttuna og alla fínu pistlana þína á árinu - veðurpistla sem aðra!

[BjornE (IP-tala skráð) 2.1.2009 kl. 14:20]

Gleðilegt ár frændi og haltu áfram þinni frábæru síðu

Skilaðu kveðju