Meðalhiti í Reykjavík frá 1901 í kubbamynd

Hér kemur nokkuð litrík mynd sem ég hef útbúið, en hún sýnir árshita hvers árs í Reykjavík frá árinu 1901. Í stað þess að sýna þetta á línuriti eins og venjulega er hér hvert ár sýnt með kubbum sem staðsettir eru eftir hitaskalanum til vinstri og hefur hver áratugur sinn lit til aðgreiningar. Samskonar mynd birti ég fyrir ári, nema að núna er árið 2009 komið inn og eins og sést er það nokkuð ofarlega á blaði, með meðalhitann 5,6 gráður.

Samkvæmt yfirliti frá Veðurstofunni, sem birt var skömmu fyrir áramót, kom fram að árið 2009 hafi verið 1,2 gráðum yfir meðallagi og í 10. sæti yfir hlýjustu árin í Reykjavík frá upphafi mælinga. Opinber meðalhiti í Reykjavík er þó ekki nema 4,3 gráður (m.v. árin 1961-1990). Hinsvegar hef ég fengið staðfest að meðalhiti liðins árs, reiknaður með tveimur aukastöfum, hafi verið 5,55 gráður þannig að mér ætti að vera óhætt að segja að meðalhitinn hafi verið 5,6 stig, með einum aukastaf. 

En nóg um það. Ef myndin er skoðuð sést að árið 2009 er þarna í ágætum félagsskap með fjórum öðrum árum en er væntanlega örlítið svalari en þau, ef rétt er að liðið ár hafi verið það 10. hlýjasta. Annars er árið 2003 það hlýjasta í Reykjavík en þar á eftir koma árin 1939 og 1941 í 2.-3. sæti. Þessi þrjú ár eru sögulega séð afar hlý og marka nokkurn veginn hitatoppana tvo sem hafa komið á landinu síðustu 100 árin. Talsvert köld ár komu um og eftir árið 1979, en það ár situr afgerandi á botninum með meðalhitann aðeins 2,9 stig, sem er talsvert kaldara en köldu árin í kringum frostaveturinn mikla 1918. Til að finna kaldara ár en 1979, þarf að fara aftur til ársins 1892. Það er athyglisvert hvað hitasveiflur hafa verið litlar eftir árið 2000 en þau ár eru öll fyrir ofan 5 gráðurnar sem þýðir að meðalhiti þessa áratugar er hærri en hefur verið áður. Á fjórða og fimmta áratugnum komu vissulega mjög hlý ár en meðalhiti þeirra ára var dreginn niður af lakari árum sem komu inn á milli.

Svo er bara spurning hvað gerist á þessu ári. Í fyrra spáði ég því að ýmsum ætti eftir að hitna í hamsi á árinu – sem gekk eftir. Ég veit ekki með þetta ár, eitthvað mun þó verða um hitamál á árinu.

Athugasemdir

[Sveinn Atli Gunnarsson, 7.1.2010 kl. 21:57]

Flott yfirlit, takk fyrir.

Nýja árið byrjar þar sem það gamla skyldi við, og sumum er kalt (brr) og sumum er jafnvel heitt í hamsi. Ég ætla að giska á að Reykjavík fari enn og aftur yfir 5°C, það er hérmeð mín opinbera spá, nú er bara að sjá hvort ég verð sannspár eður ei.

[Höskuldur Búi Jónsson, 7.1.2010 kl. 23:17]

Ég ætla að gerast svo grófur að spá að í Reykjavík verði hitinn um 5,8°C árið 2010 - skemmtileg framsetning annars. Á ekki að opna veðbanka

[Emil Hannes Valgeirsson, 7.1.2010 kl. 23:42]

Vissulega vantar 5,8°C í safnið og líka 6,0°C.

Það er ekkert að marka þessa kulda í upphafi árs hér á landi því allt bendir til þess að hlýindi muni ráða ríkjum hér á landi á næstunni. Kuldarnir verða þó áfram í Evrópu þannig að þeir eiga eftir að hugsa hlýtt til okkar.

[Sigurður Þór Guðjónsson, 9.1.2010 kl. 00:03]

Ég spái ári  upp á 2.8 stig. Þá ættu allir að verða ánægðir! 

[Emil Hannes Valgeirsson, 9.1.2010 kl. 00:41]

Ef árshitinn verður ekki meiri en 2,8 stig þá tala ég aldrei um Global warming, framar!

[Höskuldur Búi Jónsson, 11.1.2010 kl. 21:09]

Ég reikna með að ef árshitinn fer yfir 5,8°C þá hættir þú að tala um Global cooling

[Sveinn Atli Gunnarsson, 11.1.2010 kl. 21:17]

Mér sýnist ég verða að vera nákvæmari, svona til að vera í takt við hina spámennina. Ég segi 5,2°C, það verður hér með mín nákvæma spá, þá er ég samkvæmur sjálfum sér, eins og fleiri eru um þessar mundir.

[Emil Hannes Valgeirsson, 11.1.2010 kl. 23:04]

Hafi ég talað um Global cooling þá er það alveg óvart. En til að bæta fyrir það og úr því að menn eru orðnir svona spáglaðir þá spái ég meðalhita í Reykjavík upp á 6,2°C og íslausum Norðurpól í haust!

[Höskuldur Búi Jónsson, 12.1.2010 kl. 10:16]

Það er aldeilis - ég reikna náttúrulega með að þetta sé grín hjá þér, en að öllu gríni slepptu, hvað finnst þér með hafísútbreiðsluna á norðurskautinu núna? Hún er frekar lág og virðist fylgja nokkuð vel 2006-2007 línunni, sem eins og við vitum leiddi til minnstu útbreiðslu frá upphafi gervihnattamælinga (1979). Heldurðu að þetta sé vísbending um að sett verði met í minnstu hafísútbreiðslu?

[Höskuldur Búi Jónsson, 12.1.2010 kl. 10:19]

Sé að það er hægt að misskilja það sem ég sendi inn síðast - auðvitað var minnsta útbreiðslan árið 2007, en gervihnattagögnin ná aftur til 1979.

[Emil Hannes Valgeirsson, 12.1.2010 kl. 13:39]

Þetta var kannski ekki alveg raunhæf spá hjá mér en þó ekkert útilokuð. Bara skemmtilegra að spá einhverju óvenjulegu. Líklegasti árshitinn hér gæti verið um 5,4° sé miðað við síðustu ár.

Hafísútbreiðslan núna virðist vera svipuð og síðustu ár samkvæmt línuritum. En það hefur verið frekar hlýtt á Norður-íshafinu þó að kalt sé á annarstaðar. Íslaus norðurpóll í haust er ekkert útilokað, en þá er ég bara að tala um norðurpólinn sjálfan. Það munaði ekki miklu að það gerðist árið 2007 og því fóru sumir að velta því fyrir sér hvort slíkt gæti gerst árið eftir - og fengu mikla gagnrýni fyrir frá „kólnunarsinnum“ þegar það rættist ekki. Sú gagnrýni var frekar ósanngjörn enda tóku margir spánum þannig að spáð hafi verið íslausu Norður-Íshafi.