Kort - hvert fer hraunið?

Samkvæmt nýjustu myndum sem hafa verið að birtast í fréttum virðist hraun vera farið að renna ofan í gilin neðan eldstöðvanna. Ekki sér maður vel hvort þetta sé eitthvað magn að ráði en allavega virðist hraun leita niður bratt Hrunagilið sem er austan megin við Morinsheiði, þaðan gæti það náð farvegi Hraunár og niður láglendi. Spurning er síðan hvort hraun nái að renna niður gilin vestan Morinsheiðar og niður Hvanná og komi niður á láglendi vestan við Bása. Á kortinu hér hef ég teiknað inn gosstöðvarnar og hugsanlegar leiðir hraunsins. Hraunrennsli á þessu svæði er eitthvað sem fáir sáu fyrir í aðdraganda gossins, en hraunrennli þarna getur auðvitað haft ýmsar afleiðingar í för með sér. Allt veltur þó á því hversu lengi þetta varir og hversu mikið hraunmagn er á ferðinni.

Kortið er tekið úr Íslandsatlas EDDU útgáfunnar.

 

Almannavarnir loka leiðum

Athugasemdir

[S i g u r ð u r S i g u r ð a r s o n, 22.3.2010 kl. 15:12]

Rétt hjá þér. Hraunið á nokkuð greiða leið niður farveg Hrunaár. Hins vegar þarf mikið að ganga á ef hraun á eftir að fara ofan í efri hluta Hvannárgils. Ljóst er að nú fer hraun ofan í afgil Hvannárgils eins og réttilega kemur fram á kortinu þínu. Hvannárgil er þó stórt og tekur lengi við. allt veltur þetta á því hvort hraunið er seigfljótandi eða þunnfljótandi.

[Höskuldur Búi Jónsson, 23.3.2010 kl. 12:24]

Nokkuð nærri lagi, þ.e. straumurinn til Norðurs:

http://www.vedur.is/skjalftar-og-eldgos/frodleikur/greinar//nr/1847

[Emil Hannes Valgeirsson, 23.3.2010 kl. 12:50]

Gosið sjálft virðist vera örlítið vestar en ég teiknaði það, en hraunið fer þó niður gilið austan Morinsheiðar og virðist ekki komast niður vestari leiðina, sennilega hefur gjóskan byggt upp einskonar varnargarð vestan sprungunnar vegna ríkjandi vindáttar.