Tónlistarhúsið 2006-2010

Einn af föstum árlegum dagskrárliðum á þessari bloggsíðu er að birta ljósmynd af tónlistarhúsinu séð ofan af Arnarhóli. Hverja mynd hef ég tekið um hádegi einhvern bjartviðrisdaginn síðustu dagana í ágúst nema ein sem var tekin 1. september. Myndatakan nær aftur til ársins 2006 þegar gamli Faxaskálinn stóð enn uppi en þá voru framkvæmdir á svæðinu nýhafnar.

Tónlistarhúsið hefur breytt mikið um svip frá því í fyrra því nú er glerísetning hafin og búið að raða upp hinum miklu gluggakubbum á suðurhlið hússins sem blasir við frá Arnarhóli. Það er síðan til marks um skrykkjótta byggingarsögu tónlistarhússins að allt þetta kubbaverk þarf að taka niður og raða saman upp á nýtt vegna smíðagalla. Þetta þarf að gerast svo að gluggaumgjörðin standist þau verstu óveður sem hér geta skollið á. Ekki væri gott ef dýrindis glerverkið sáldraðist um allan bæ í einhverju rokinu. Þetta vesen mun þó ekki kosta okkur skattborgarana neitt auka, því mistökin skrifast á kínversku undirverktakana og húsið mun eftir sem áður opna í maí á næsta ári. Þetta tefur þó frágang að utanverðu þannig að þegar fyrstu lúðrar hljóma næsta vor og hörpusláttur hefst í húsinu verður gluggauppsetningu ólokið. Húsið eins og það lýtur út í dag er því einskonar forsýning þess sem verður. 

En hér er myndasyrpan: 

Athugasemdir

[Björn Emilsson, 5.9.2010 kl. 12:42]

Hörmuleg bygging, skúrinn, eða hvað á að kalla fyrirbærið, er eins og sé að renna í sjó fram eftir fellibyl í Florida.

[Hörður Halldórsson, 5.9.2010 kl. 14:52]

Höfum við nokkuð efni á að reka það næstu árin.?Væri hægt að leyfa Kolaportinu að vera á jarðhæðinni?

[Sigurður Þór Guðjónsson, 5.9.2010 kl. 16:18]

Frá Arnarhóli séð var Akrafjalla fallegra. Þetta er í alla staði hörmulegt hús.

[Emil Hannes Valgeirsson, 5.9.2010 kl. 17:17]

Ég læt bara aðra um neikvæðnina og ætla að gefa húsinu séns þangað til það er alveg tilbúið. En mér finnst þó spurning hvort húsið sé of utarlega í stað þess að vera nær gamla Faxaskála. Nú sitjum við líka uppi með stórt uppgrafið svæði sem þarf að fylla upp með einhverju.

[Sigurður Þór Guðjónsson, 6.9.2010 kl. 01:27]

Mér finnst það ekki neikvæðni að finnast þetta hús ljótt og leiðinlegt á þessum stað.

[Jón Steinar Ragnarsson, 6.9.2010 kl. 03:21]

Mé finnst eins og risastór tundurspillir frá fyrra stríði hafi strandað þarna. Það á raunar við um aðra póstmóderníska sjálfsfróun þarna á svæðinu.  Þetta verður þau einatt góður minnisvarði um vitfirringuna, sem setti okkur á hausinn og gerði okkur að þurfalingum í alþjóðasamfélginu til óljósrar frambúðar.

[Emil Hannes Valgeirsson, 6.9.2010 kl. 08:34]

Ef maður er nógu andskoti jákvæður þá finnst manni allt gott og fallegt.

[Sverrir Björnsson. (IP-tala skráð) 6.9.2010 kl. 09:09]

Skemmtilegar heimildamydir. Gler listaverk Ólafs Elíassonar utaná húsinu er snilld, eins og  flest sem sá maður gerir. Gott að það kom eitthvað af viti útúr góðæðinu.

P.s. Er ekki örugglega búið að selja fasistum í Milano ráðhús Reykjavíkur?