Hversu gott var veðrið í ágúst?

Þá er komið að dagbókaryfirliti fyrir nýliðinn ágústmánuð í Reykjavík ásamt smá samanburði við fyrri ár. Sem fyrr er þetta unnið upp úr eigin veðurskráningum sem ná aftur til ársins 1986. Aukaafurð þessara skráninga er mitt háþróaða einkunnakerfi sem tekur mið af veðurþáttunum fjórum: sól, úrkomu, vindi og hita. Alslæmir dagar fá 0 í einkunn en algóðir dagar fá 8. Það telst gott ef meðaleinkunn mánaðarins er yfir 5 stigum en afleitt ef hún nær ekki 4 stigum. Allt þetta miðast eingöngu við veðrið í Reykjavík yfir daginn.

Hér til hliðar er veðurskráningin fyrir nýliðinn ágúst. Tölurnar aftast eru einkunnir. Í dálki á eftir vindörvum er hiti dagsins. Táknin þar fyrir aftan segja til um hvort hiti dagsins teljist í meðallagi, hlýr eða kaldur. Fyrri hluta ágústmánaðar miða ég meðallagið við 10-15 stig en seinni hlutann 9-14.

Ágúst 2011 - Einkunn 5,2
Nýliðinn ágúst fékk samkvæmt þessu skráningarkerfi einkunnina 5,2 stig sem telst góð einkunn og vel yfir meðallagi. Allir mánuðir frá því í maí hafa verið góðir í Reykjavík og náð einkunn í kringum 5 stig en nýliðinn ágúst gerir betur og fær hæstu einkunn það sem af er ári. Frá því skráningar hófust hefur aðeins einn ágústmánuður náð betri einkunn, en ég kem að því hér síðar.
Mánuðurinn var vissulega sólríkur en margir hafa þó verið sólríkari og hann var hlýr þótt margir hafa verið hlýrri, hinsvegar er þetta með allra þurrustu ágústmánuðum í borginni og að auki fæ ég út að hann hafi verið óvenju hægviðrasamur og er að því leyti eins og bestu vormánuðir. Boxið neðst til vinstri á skráningarsíðunni sýnir tíðni og styrk hverrar vindáttar og þar fær norðanáttin hæsta gildið enda voru 5 norðanáttardagar í röð um miðjan mánuðinn. Hlykkjóttar hægviðrispílur eru algengar en aldrei þurfti ég að teikna tvöfaldar hvassviðrispílur. Talan 43 fæst með því að leggja tölurnar saman í boxinu en þetta er lægsta vindatalan sem ég hef skráð fyrir ágúst. Eftir á að koma í ljós hvort Veðurstofan sé sammála mér þarna.
Hæsti hiti mánaðarins náðist þann 5. ágúst í skýjaðri norðaustanátt og það er eina skiptið sem hitinn náði 20 stigum í borginni í sumar og voru það akkúrat 20 stig eftir því sem ég best veit. Skráðar hitatölur hjá mér (dálkur á eftir vindörvunum) sýna dæmigerðan hita yfir daginn hverju sinni. Meðaltal þeirra er 13,3° og það getum við kallað dæmigerðan dagshita í mánuðinum.

Bestu ágústmánuðir frá 1986
Ágúst 2004 - Einkunn 5,3. Þessi mánuður er sögulegur vegna hitabylgjunnar óvenjulegu sem þá reið yfir og þetta er með allra hlýjustu mánuðum sem yfirleitt hafa komið í Reykjavík þótt reyndar hafi verið enn hlýrra að meðaltali árið á undan. Mánuðirinn var einnig mjög sólríkur og þurr og hefði fengið algera úrvalseinkunn ef fyrstu og síðustu dagarnir hefðu ekki skemmt fyrir.
Ágúst 2009 og 2011 - Einkunn 5,2. Hér er nýliðinn mánuður í góðum félagsskap með ágúst 2009. Það sumar var með eindæmum gott í Reykjavík, allavega samkvæmt mínum bókum en sumrin hafa reyndar flest verið mjög góð undanfarin ár hér í borginni. Ágúst 2009 var heldur sólríkari og hlýrri en nú í ár en ekki eins hægviðrasamur.
Ágúst 1987 - Einkunn 5,1. Þessi mánuður þótt aldeilis góður á sínum tíma enda voru sumrin ansi misgóð á 9. áratugnum. Eins og oft gerist datt botninn úr þessum mánuði í lokin því lengst af stefndi þarna í mun hærri einkunn.
Ágúst 1994, 2003 og 2010 - Einkunn 5,0. Þarna má sjá ágústmánuð í fyrra og hlýjasta ágúst sem mælst hefur í Reykjavík á því hlýja ári 2003. Ágúst 1994 gerði það gott með alhliða gæðum en ekki endilega mörgum sólardögum.

Og þeir verstu:
Ágúst 1995 - Einkunn 4,0. Þarna skráði ég bara 3,5 sólardaga sem segir sína sögu enda var þetta mjög þungbúinn sunnanáttarmánuður sem nýttist betur norðanlands og austan.
Ágúst 2005 - Einkunn 4,2. Einhvern veginn tókst þessum mánuði að falla á prófinu en hann var ekkert afgerandi slakur nema þá helst vegna sterkra vinda úr ýmsum áttum og misslæmum veðrum inn á milli.

Fleiri mánuði nefni ég ekki til sögunnar en allir hinir hafa fengið einkunnir á bilinu 4,4–4,9. Enn eitt góðviðrissumar er að baki hér í Reykjavík. Senn svífur að hausti með kraftmeiri veðrum, meira fjöri og áframhaldandi veðurskráningum. Ég á síður von á að að halda birtingum á þeim áfram nema þjóðin fari fram á það með miklum látum – sem er frekar ólíklegt.

Athugasemdir

[Þorkell Guðbrandsson (IP-tala skráð) 3.9.2011 kl. 21:46]

Takk fyrir að leyfa okkur að sjá þetta, Emil Hannes. Svona tafla er auðvitað miðuð við athugunarstað og gaman væri ef einhverjir færu að dæmi þínu á öðrum landshornum og gæfu veðrinu einkunnir eftir sambærilegum skala.

[Sveinn Atli Gunnarsson, 3.9.2011 kl. 22:20]

Mér þykir þetta alltaf fróðlegt. Ekki veit ég hvort þú ert til í að láta eins og ég sé að tala fyrir þjóðina "með látum", en mér þætti gaman að sjá meira af þessu, alla vega svona ársfjórðungslega - ef ég mætti vera svo frekur...

Líst vel á hugmynd Þorkels, hann getur kannski tekið einn athugunarstað fyrir?

[Emil Hannes Valgeirsson, 3.9.2011 kl. 22:53]

Ég sé að hér eru komnar athugasemdir sem er ágætt því þá get ég sagt meira. Það gæti stundum verið forvitnilegt að fá samanburð annars staðar frá og ég hef velt fyrir mér að prófa að skrá niður aðra staði samtímis Reykjavík. Ég nota mikið línuritin frá sjálfvirkum veðurathugunum í Reykjavík af Veðurstofuvefnum og þau eru það góð að ég þarf í rauninni ekki alltaf að vera í bænum í eigin persónu. Hinsvegar þá vantar yfirleitt línurit fyrir sólgeislun á stöðum úti á landi sem þýðir að ég get ekki skráð sólskin utan Reykjavíkur nema að vera á staðnum sjálfur.

En hvort ég birti fleiri mánuði kemur bara í ljós. Ég hef einstaka sinnum birt mánuði sem eru sérstakir t.d. óvenju slæmir eða góðir. Kannski væri sniðugt að taka fyrir september næst því það hafa verið nokkrar öfgar í veðurgæðum þess mánaðar. Það er til dæmis einn septembermánuður á þessari öld sem malar alla aðra í veðurgæðum en árið eftir kom mánuður sem fékk algera falleinkun. Hvaða ár skildu þetta vera?

[Björn Jónsson (IP-tala skráð) 5.9.2011 kl. 01:01]

September 2006 var einstaklega góður en mér fannst að vísu september 2005 miklu verri en september 2007 vegna þess hvað hann var óvenjulega kaldur (framhald af kuldum og leiðinda veðri seint í ágúst 2005 sem trúlega vegna þess náði að "falla á prófinu").

[VJE (IP-tala skráð) 5.9.2011 kl. 04:02]

Eitt er það sem mig hefur lengi langað til að koma á framfæri og varðar sjálfa Veðustofuna. Þegar spámönnum þeirrar stofnunar verður gengið út á útsýnissvalir hússins í góðu skyggn blasir við þeim víðáttumikil sjón til allra átta. Þ.e.a.s. gufuhvolfið einsog það leggur sig allt austan frá Rang-árvöllum og vestur á víðáttur Breiðafjarðar. Mér telst svo til að útsýnið nái til allt að 10 sýslna á suður- og suðvesturlandi. Dalasýslu, Snæfellsness-og Hnappadalssýslna, Mýra- og Borgarfjarð-arsýslna, Gullbringu- og Kjósarsýslna, Árnessýslu og allt austur í Rangarvallasýslu. Barðastrandar-sýslu mætti eflaust telja með líka og ekki má gleyma sjálfum Faxaflóanum. — Þetta kemur oft upp í hugann þegar verið er að flytja veðurlýsingar og fjálg-legar lýsingar um skýjafarið í Reykjavík þar sem oftar er tekið þannig til orða að hálfskýjað sé í höfuðstaðnum, skýjað eða í besta falli léttskýjað, heiðskirt er varla til í bókum þeirra.— Sem sagt, sjáist skýhnoðri einhversstaðar á öllu þessu svæði, þá skal það heita svo að skýjað sé í Reykjavik.

[Emil Hannes Valgeirsson, 5.9.2011 kl. 11:55]

Það má skoða þennan samanburð á septembermánuðum næst. Fólk er sjálfsagt ekki alltaf sammála um hvernig eigi að meta veðurgæði en árin 2006 og 2007 eru vissulega þessir mánuðir sem ég var að vísa í.

Ég veit ekki alveg hvernig Veðurstofan metur skýjafar en það er ekki alveg nógu gott ef rétt er að ský í öðrum sýslum séu að hafa mikil áhrif á veðurlýsinguna héðan.