Mánaðar- og árshiti í Reykjavík

Nú skal kynnt til sögunnar súlnaverk mikið sem ég hef útbúið en því er meðal annars ætlað að sýna hvert gæti stefnt með árshitann í Reykjavík, þó ekki sé langt liðið á árið. Myndin ætti að skýra sig sjálf en geri hún það ekki þá tákna bláu súlurnar meðalhita hvers mánaðar samkvæmt núverandi opinbera meðaltali 1961-1990 sem vill svo til að er frekar kalt tímabil. Rauðu súlurnar sem rísa hærra er hinsvegar meðalhiti síðustu 10 ára sem er öllu hlýrra tímabil. Fjólubláu súlurnar standa svo fyrir þá mánuði sem liðnir eru af núverandi ári, 2014.
Hægra megin við strik eru 5 súlur sem sýna ársmeðalhita. Bláa súlan þar er kalda meðaltalið 1961-1990 (4,3°) og sú rauða er meðalhiti síðustu 10 ára (5,4°). Allra lengst til hægri er græn súla sem stendur fyrir meðalhitann í fyrra, 2013 (4,9°) sem var kaldasta árið í Reykjavík, það litla sem af er öldinni.

Spennan liggur í því hvert stefnir með þetta ár og þar koma tónuðu súlurnar tvær við sögu. Sú bláfjólubláa segir til um árshitann ef mánuðirnir sem eftir eru verða akkúrat í kalda meðaltalinu en sú rauðfjólubláa sýnir hver árshitinn verður ef restin verður jöfn meðalhita síðustu 10 ára. Eftir því sem líður á árið fæst skýrari mynd af því hvert meðalhitinn stefnir og ef vel liggur á mér mun ég birta uppfærslur oftar en sjaldan.

Fyrstu þrír mánuðir þessa árs hafa allir verið yfir meðalhita síðustu 10 ára. Ekki munar miklu í febrúar og mars, en janúar var umtalsvert hlýrri. Samkvæmt mínum útreikningum er staðan eftir þrjá mánuði þá þannig að út frá kalda meðaltalinu stefnir árshitinn í Reykjavík í 4,8 stig, en sé framhaldið reiknað út frá síðustu 10 árum stefnir árshitinn í 5,6 stig.
Ársmeðalhiti á bilinu 4,8–5,6 ætti því að vera líklegur en gæti endað neðar og gæti endað ofar. Þó að byrjunin lofi góðu er engu að treysta, samanber árið í fyrra sem byrjaði með enn meiri hlýindum en þetta ár. Haldi árið hinsvegar áfram að vera hlýtt má hafa í huga að árshitametið í Reykjavík er 6,1 stig, frá árinu 2003.

Athugasemdir

[Hilmar Hafsteinsson (IP-tala skráð) 12.4.2014 kl. 14:39]

Þakkir fyrir góða samantekt EHV. Þróun meðalhita ársins 2014 verður sannarlega áhugaverð.

Bendi vinsamlegast á að meðalhiti fyrstu þriggja mánaða ársins 2014 er lægri en samsvarandi meðalhiti jan-mars 2013.

Ef við gefum okkur sömu þróun í ár og var í fyrra þá er ljóst að meðalhiti 2014 verður um, eða undir, 4,8°C. Það er að kólna! :)

[Emil Hannes Valgeirsson, 12.4.2014 kl. 15:06]

Já, eins og ég skrifa þarna í lokin þá byrjaði árið í fyrra með enn meiri hlýindum en í ár. Apríl í fyrra var síðan ansi kaldur og átti stóran þátt í slökum meðalhita 2013 miðað við 10 árin þar á undan

[Sveinn Atli Gunnarsson, 12.4.2014 kl. 17:55]

Takk fyrir samantektina Emil. Veistu annars hvernig hitastigið hefur verið á Íslandi þegar það eru El Nino ár? Þ.e. eru El Nino ár almennt heitari eða kaldari hér á landi - eða er kannski ekkert hægt að sjá út úr því? Það væri fróðlegt að velta því fyrir sér, þar sem það eru komnar fram spár um að El Nino fyrirbærið sé jafnvel að fara í gang í Kyrrahafinu - sumir tala jafnvel um sterkann El Nino...sem myndi þá væntanlega hafa töluverð áhrif á meðalhita á heimsvísu - hvað sem gerist staðbundið á Íslandi...

[Emil Hannes Valgeirsson, 12.4.2014 kl. 18:45]

Ég hef ekki séð að það sé neitt beint samhengi milli El Nino og hitafars á Íslandi. Það var til dæmis ekkert að gerast hér þegar stóri El Nino var ríkjandi 1997/98. Meðalhitinn í Reykjavík 1998 var t.d. 4,7 stig eða svipað og árin þar um kring. Svo var smærri El Nino árið 2010 sem vill svo til að er með allra hlýjustu árunum hér. Oft er nú talað um að allskonar öfgar í veðri fylgi EL Nino. Veit þó ekki hvort slíkt skili sér hér en það er kannski best að gera ráð fyrir öllu ef El-Nino spár ganga eftir, sem þær gera sennilega.

[Hilmar Hafsteinsson (IP-tala skráð) 12.4.2014 kl. 20:19]

Skil ég það rétt félagar, Sveinn Atli Gunnarsson og Emil Hannes Velgeirsson, að þið séuð í alvöru að ræða möguleg áhrif náttúrulegrar sveiflu á meðalhita á heimsvísu/meðalhita á Íslandi :)

[Emil Hannes Valgeirsson, 12.4.2014 kl. 21:19]

Já þú ert kannski aðeins farinn að skilja okkur. Þetta er ekki eintóm ónáttúra.

[Hilmar Hafsteinsson (IP-tala skráð) 12.4.2014 kl. 21:32]

... en hvað varð þá um "undirliggjandi" hlýnunina? :)

[Emil Hannes Valgeirsson, 12.4.2014 kl. 21:46]

Það varð ekkert um hana – hún er ennþá undirliggjandi.

[Hilmar Hafsteinsson (IP-tala skráð) 12.4.2014 kl. 22:51]

Er náttúrulega sveiflan þá "yfirliggjandi"? :)

[Emil Hannes Valgeirsson, 13.4.2014 kl. 11:12]

Það má orða það þannig samanber þessa mynd sem birtist með einum af mínum gestapistlum á loftslag.is. Olíutunnunni er einmitt ætlað að sýna hvernig hlýnun af mannavöldum er undirliggjandi en náttúrulega sveiflur "yfirliggjandi" með þeim afleiðingum að rauði ferillinn leitar upp en þó ekki án staðnana og niðurveiflna.

[Sveinn Atli Gunnarsson, 13.4.2014 kl. 21:55]

Væntanlega er erfitt að sjá samhengi í hitastiginu á Íslandi og samspili þess við El Nino. En allavega þá virðist vera gott samhengi á milli samsæriskenninga og afneitunar loftslagsvísinda - enda oft stundað af sömu aðilum - hvað sem öðru líður.

[Hilmar Hafsteinsson (IP-tala skráð) 14.4.2014 kl. 13:52]

Margur hyggur mig sig Sveinn Atli Gunnarsson, eða hvað kallast menn sem boða skelfilega óðahlýnun, undirliggjandi/yfirliggjandi, á sama tíma og ljóst er að meðalhiti í Reykjavík árið 2013 var 4,9°C?

Það er dagljóst að meðalhitinn í Rek 2013 er á pari við ársmeðalhita í höfuðstaðnum á kuldatímabilum síðustu aldar!

a f n e i t u n hvað?

[Emil Hannes Valgeirsson, 14.4.2014 kl. 18:04]

Meðalhitinn í fyrra var ekki á pari við kuldatímabil síðustu aldar.

Meðalhitinn 1961-1990 í Reykjavík var 4,3 stig.

Meðalhitinn 2013 var 4,9 stig sem hefði þótt bara aldeilis gott á kalda tímabilinu.

[Höskuldur Búi Jónsson, 14.4.2014 kl. 18:08]

Eitt hlýtur að breytast við El Nino - þeir sem telja að hnötturinn sé að kólna munu þurfa að færa sig yfir í einhverja aðra afneitun. Líklega setja út á gögnin eða predika um að hlýnunin sé náttúruleg