Ekki enn búið að mála yfir myndina mína

Í hreinsunarátaki því sem borgaryfirvöld standa nú fyrir með orgelleikarann Jack Magnet í broddi fylkingar hefur margt veggjakrotið miðbænum þurft að víkja fyrir málningarrúllunni og kannski ekki vanþörf á. Sumum hefur þó brugðið í brún þegar metnaðarfull myndverk hafa allt í einu horfið undir gráa málninguna eins og um hvert annað næturkrot pörupilta hafi verið um að ræða. Þetta varð til þess að mér datt í hug að kíkja í Kolaportið, og þá meina ég Kolaportið hið eina og sanna, sem er bílageymsluhús við Seðlabankann og hýsti á sínum tíma markaðinn góða sem kenndur er við staðinn.

Árið 1990 á meðan markaðurinn var þarna enn starfræktur var ég á meðal þeirra 25 listamanna og teiknara af yngri kynslóðinni sem tóku þátt í að myndskreyta veggi bílastæðahússins. Staðið var að verkinu þannig að hver og einn fékk sína fermetra til að myndskreyta og gerði hver sína mynd eftir eigin höfði, án tillits til þess hvað sá næsti gerði. Ég ákvað að mála borgarlandslag, húsablokkir með beinum ákveðnum línum og gráa götu sem gul Volkswagen-bjalla í yfirstærð ók eftir í rólegheitum. Fyrirmyndin að bílnum var mín eigin glæsibifreið sem ég ók um götur borgarinnar, átta fyrstu ökuárin mín. Skemmst er frá því að segja að nú eftir næstum átján ár er verkið nánast sem nýmálað og hefur ekki enn orðið hreinsunarátakinu að bráð, enda væntanlega allt unnið með fullu samþykki yfirvalda.

Á meðan á gjörningnum stóð á sínum tíma heiðraði blaðamaður Þjóðviljans okkur með nærveru sinni ásamt ljósmyndara og þar komst ég þar svo sannarlega á blað ásamt stórri mynd. Umfjöllunin birtist svo í Þjóðviljanum þann 11. september árið 1990 og kannski er það bara tilviljun, en nákvæmlega 11 árum síðar varð New York-borg í heimsfréttunum þegar tvö stór farartæki komu aðvífandi og ollu þar talsverðum usla. En þar kom ég reyndar hvergi nærri.

 

 

Athugasemdir

[Lára Hanna Einarsdóttir, 25.6.2008 kl. 00:42]

Þetta er ******* flott verk hjá þér. Manstu hvað þetta er stórt? Og manstu hvaða fleiri listamenn voru þarna með þér? Samkvæmt Þjóðviljagreininni voruð þið 25 sem skreyttuð portið. Eru öll verkin ennþá ósnert?

Spurningaflóð er þetta, kona!

[Emil Hannes Valgeirsson, 25.6.2008 kl. 09:53]

Sko, þetta eru þrjú bílastæði og myndin sennilega um 8-9 metrar á breidd og rúmir 2 m. á hæð. Þeir sem þarna máluðu vorur aðallega krakkar sem höfðu klárað „Mynd og hand“ tvö árin áður. Ég man ekki eftir öllum en svo ég nefni einhverja þá var Jóhann L. Torfason vinstra megin við mig og Birgir Snæbjörn Birgisson til hægri, Halldór Baldursson skopmyndateiknari var svo þarna skammt undan. Verkin eru öll til staðar í dag, en þau sem eru innst hafa eitthvað dofnað og svo er eitthvað lítilega búið að krota ofaná þetta, t.d. á mína mynd.