Árið 2008 er kaldasta árið það sem af er öldinni

Nú er búið að gefa það út að þetta ár verður það kaldasta á jörðinni síðan árið 2000. Þegar svona fréttir birtast er auðvitað hægt að túlka þær á mismunandi hátt eftir því hvaða viðhorf menn hafa til loftslagshlýnunar af mannavöldum. Kaldasta árið það sem af er þessari öld hljómar vissulega ekki vel á sama tíma og allt á að vera hlýna. Hinsvegar er árið 2008 samt í 10. sæti yfir hlýjustu árin frá því mælingar hófust en þessi 10 hlýjustu ár hafa öll átt sér stað á síðustu 15 árum. Á árunum fyrir 1980 hefði þetta ár hins vegar verið algerlega út úr kortinu vegna hita, svo mikið hefur hlýnað á jörðinni undanfarna áratugi. 

 

Á meðfylgjandi línuriti sem birtist með frétt um þetta á vef Guardian er sýnd hitaþróun jarðarinnar frá miðri 19. öld samkvæmt gögnum frá Met Office's Hadley Centre. Á þessari mynd má greinilega sjá talsverðar sveiflur, ekki bara á milli ára heldur líka á milli áratuga. Það má alveg velta því fyrir sér þegar myndin er skoðuð hvort ákveðnum toppi hafi verið náð um og eftir árið 2000 og hvort eitthvað bakslag sé komið í hitafar jarðar. Það bakslag gæti kannski verið svipað því sem átti sér stað uppúr 1940 og jafnvel einnig árið 1880. Ef svo er þá erum við með 3 megin-hitabakslög á 60 ára fresti, þótt langtímaþróunin liggi upp á við.

Annars er ómögulegt að segja hvar við erum stödd í dag. Árið 2008 er hugsanlega bara eitt stakt kalt ár en gæti líka verið byrjunin á tímabundinni niðursveiflu eða stöðnun á hita eins og ýmislegt bendir reyndar til, meðal annars vegna þess sem er að gerast í Kyrrahafinu, en það stóra hafsvæði virðist vera að læsast í köldum fasa sem getur varað í nokkur ár eða áratugi (sjá hér). Hinsvegar valda gróðurhúsáhrifin ein og sér tæplega áratugasveiflum í hita því aukningin á CO2 er stöðug, en þau geta vel átt sinn þátt í heildarhlýnun síðustu 100 ára.

Ég lagði annars dálitla vinnu í að skoða hugsanleg áhrif sólarinnar og hafsstrauma á hitafar í færslu sem ég skrifaði núna í október þar sem spurt var í hinni mestu hógværð: Hvað veldur hlýnun jarðar?

Athugasemdir

[Ágúst H Bjarnason, 13.12.2008 kl. 17:41]

Það er fróðlegt að sjá hvernig hafísinn á norðurslóðum hefur þróast.

Ferillinn fyrir árið 2008 er kominn upp fyrir ferlana fyrir 2005, 2006 og 2007.

Ferillinn er frá dönsku veðurstofunni DMI: http://ocean.dmi.dk/arctic/icecover.uk.php

 

[Ágúst H Bjarnason, 13.12.2008 kl. 18:09]

Myndir varð óvart heldur stór :-)

Sjá líka ferlana hjá Nansen Environmental & Remote Sensing Center

[Sigurður Þór Guðjónsson, 14.12.2008 kl. 00:48]

Hvað Ísland varðar er ólíklegt að árið verði kaldara en 2005 og verði enn eitt árið með meðalhita yfir 5 stigum eins og öll ár hafa verið frá og með 2001.

[Villi Asgeirsson, 14.12.2008 kl. 06:10]

Athyglisvert.

[Snorri Gylfason (IP-tala skráð) 14.12.2008 kl. 10:12]

Þakka þér fyrir Emil, en það verður örugglega erfitt að sannfæra hörðustu "umhverfissinnana um þetta."

[Villi Asgeirsson, 14.12.2008 kl. 12:32]

Ég er ekki viss, Snorri. Ég var einn af þeim, en það er með þetta eins og annað. Það er enginn einn stóri sannleikur. Ég held að flestir skilji það. Hinir munu ekki láta af sinni trú.

[Emil Hannes Valgeirsson, 14.12.2008 kl. 13:07]

Það þekkir sennilega enginn stóra sannkeikann í þessum málum en sjálfum finnst mér hættan af loftslagshlýnun alls ekki vera liðin hjá þótt hlýnunin sé komin komin í pásu um einhvern tíma. Hitaþróunin er sjálfsagt blanda af náttúrulegum þáttum og mannlegum. Náttúrulegi þátturinn getur unnið gegn loftslagshlýnun tímabundið en ýtt svo undir hlýnunina þess á milli. Það er sem sagt heildarþróunin á mörgum áratugum eða lengur, sem gildir. Það er ennþá mjög hlýtt á jörðinni, þetta ár er líka hlýtt á Íslandi og það er ennþá stutt í krítískt ástand á heimskautaísnum. Umræðan hefur hinsvegar oft verið frekar einsleitt og áróðurskennd á báða bóga þar sem mannfólkinu er ýmist kennt um allt eða ekkert sem miður fer í náttúrunni.

[Sigurður Þór Guðjónsson, 14.12.2008 kl. 15:09]

Ég á við Reykjavik með 5 stigin.

[Emil Hannes Valgeirsson, 14.12.2008 kl. 16:14]

Ég náði því Sigurður, en það hlýtur að vera víðar hlýtt á landinu. Ætli árið stefni ekki í 5,2° gráður í Reykjavík eða jafnvel 5,3°C ef jólahlýindin sem eru í langtímaspám ganga eftir. Átta 5 stiga ár í röð í Reykjavík er auðvitað athyglisvert.