Árshiti síðustu 100 ára í Reykjavík á einni mynd

Veðurstofan hefur upplýst að meðalhiti ársins í Reykjavík hafi náð 5,3°C. Það er í ágætu samræmi við hita síðustu ára en heilli gráðu yfir meðalhita viðmiðunartímabilsins 1961-'90. Til að sýna árshitann í víðara samhengi hef ég útbúið nokkuð litríka mynd að hætti hússins þar sem hægt er að bera saman árshita síðustu 100 ára í Reykjavík samkvæmt opinberum gögnum. Í stað þess að sýna þetta á línuriti eins og venjan er, eru árin nú sýnt með kössum sem eru staðsettir eftir hitaskalanum til vinstri. Hver áratugur hefur síðan sinn lit til aðgreiningar. Undir myndinni má svo lesa nánari athugasemdir.

Ef myndin er skoðuð sést að árið 2008 er þarna í ágætum félagsskap með árunum 1953 og 1956 með 5,3°C í meðalhita. Hlýjast er árið 2003 og árin 1939 og 1941 eru svo í 2-3 sæti, en þessi þrjú ár eru sögulega séð afar hlý og marka nokkurn veginn hitatoppana tvo sem hafa komið á landinu síðustu 100 árin. Talsvert köld ár komu um og eftir árið 1979 sem situr nokkuð afgerandi á botninum með meðalhitann aðeins 2,9°C sem er talsvert kaldara en köldu árin í kringum frostaveturinn mikla 1918, en til að finna kaldara ár en 1979 þarf að fara aftur til ársins 1892.

Það er athyglisvert hvað hitasveiflur hafa verið litlar eftir árið 2000 sem eru öll fyrir ofan 5 gráðurnar sem þýðir að meðalhiti síðustu ára er hærri en hefur verið áður. Á fjórða og fimmta áratugnum komu vissulega mjög hlý ár en meðalhiti þeirra ára var hinsvegar dreginn niður af lakari árum sem þá komu inn á milli.

Svo er bara spurning hvað gerist á þessu ári sem er framundan en mörgum á þó sjálfsagt eftir að hitna í hamsi á árinu 2009 burt séð frá veðrinu.

Hitinn yfir meðallagi árið 2008

Athugasemdir

[Einar Áskelsson (IP-tala skráð) 2.1.2009 kl. 14:02]

Var meðalhiti á árinu 2003 hærri en 2004?  Ótrúlegt hvað maður blekkist af hitabylgjum sbr. þeirri í ágúst 2004.  Athyglisvert að árið 1979 hafi verið kaldara en frostaveturinn 1918 eða 19.  Man vel að sumarið kom eiginlega aldrei 1979, voraði yfir hásumarið og svo kom aftur vetur.  Takk fyrir grafíkina af tölfræðinni.  Áhugavert.

[Emil Hannes Valgeirsson, 2.1.2009 kl. 15:09]

Já það er líka merkilegt að þrátt fyrir hitabylgjuna í ágúst 2004 var ágústmánuður 2003 í Rvík aðeins hlýrri í heildina og reyndar sá hlýjasti ágúst sem kom hefur (12,8°C). Þessir tveir ágústmánuðir eru með allra hlýjustu mánuðum sem mælst hafa í borginni. Metið á hinsvegar júlí 1991 (13,0°C). Hitametsmánuðurinn í júlí núna í sumar endaði í 12,5°C hér í Reykjavík.

Svona veðurtölfræði getur verið athyglisverð en ég hef safnað þessum tölum saman úr ýmsum áttum, aðallega þó af eldri vef Veðurstofunnar.

[Geir Ágústsson, 2.1.2009 kl. 17:07]

Mjög athyglisverð mynd. Hér sést að stundum eru moggabloggarar betri í að segja frá atburðum og setja hluti í samhengi en sjálfur Mogginn.

[Sigurpáll Ingibergsson, 2.1.2009 kl. 22:34]

Flott mynd. Það má sjá normalkúrfuna þarna. Athyglisvert að sjá árið 1979 svona neðarlega.  Sá svipað graf í Markaðnum um áramótin yfir gengi hvers árs í S&P vísitölunni. Þar var árið 2008 með 1931 úti á kanti með -50% fall.

[Sigurður Þór Guðjónsson, 3.1.2009 kl. 00:14]

Flott!

[Ágúst H Bjarnason, 5.1.2009 kl. 09:33]

Takk fyrir þessa góðu framsetningu.