Hitafar síðustu 20 vetra

Nú er þegar aðal vetramánuðirnir eru að baki er kominn tími á að skoða hvernig hitafarið hefur verið samanborið við liðin ár. Samanburðurinn er settur fram á myndrænan hátt og sýnir hitafar yfir vetrarmánuðina nóvember-mars í Reykjavík síðustu 20 ár eða allt aftur til haustsins 1989. Samskonar mynd birti ég einnig í fyrra en nú hefur liðinn vetur bæst við. Þessa vetrar verður sjálfsagt minnst í framtíðinni fyrir allt annað en veður. Þetta var reyndar harðindavetur, en þó ekki í veðurfarslegum skilningi. Þrotaveturinn mikli gæti hann kallast eins og ég stakk upp á í haust kvöldið áður stóru atburðirnir brustu á. En hvað um það, þannig lítur hitafar síðustu 20 vetra út. (Nánari skýringar eru fyrir neðan mynd)

Hver láréttur borði táknar einn vetur og litirnir tákna hitafar. Þannig stendur dökkblár litur fyrir kuldakast með 5-10 stiga frosti að meðaltali, en appelsínugulur táknar hlýindi uppá 5-10 stiga hita. Myndin er einfölduð þannig að það sjást ekki stakir dagar heldur er meðalhitinn sýndur nokkurra daga í senn eftir því sem við á, en þannig sjást vel einstök hita- og kuldatímabil hvers vetrar. Þetta er byggt á eigin skráningu á meðalhita yfir daginn en til hægri sést meðalhiti sömu mánaða skv. tölum Veðurstofunnar.

Eins og sjá má var meðalhitinn í Reykjavík þessa 5 mánuði 1,2 gráður sem er ekki fjarri því sem hefur verið allra síðustu ár. Það voru ekki miklar hitaöfgar þennan vetur, mildast var í kringum áramótin en kaldasta tímabilið var í lok janúar og fyrri hluta febrúar. Á myndinni sést einnig að veturinn 2002-'03 sker sig nokkuð úr og má segja að hann sé aðaluppistaðan í vetrarhlýindunum hin síðari ár og kannski líka tímamót því síðan þá hefur meðalhitinn alltaf náð einni gráðu.

Athugasemdir

[Kjartan Pétur Sigurðsson, 11.4.2009 kl. 08:55]

Annars magnað að spá í þessi mál. En meðalhiti yfir vetramánuðina á "Íslandi" er töluvert hærri en gerist víðast hvar í Evrópu og fer nánast aldrei niður fyrir 0°C! Útlendingar sem að ég tala við trúa því ekki að þetta sé raunin. Að vísu skal það viðurkennast að það gildir eitthvað allt annað með sumarmánuðina. Að sjálfsögðu er það gólfstraumurinn og sjórinn í kringum landið sem hefur mestu áhrifin og svo ríkir heldur ekki meginlandsloftslag hér.

[Ívar Pálsson, 11.4.2009 kl. 12:56]

Takk, þetta er mjög áhugavert og skemmtilega skýrt, Emil Hannes.

[Einar Sveinbjörnsson, 11.4.2009 kl. 17:10]

Þessi framsetning þín Emil á hitanum er einkar áhugaverð !!

ESv 

[Lára Hanna Einarsdóttir, 13.4.2009 kl. 11:45]

Tek undir með Einari, þetta er skemmtileg framsetning!  Og gaman að skoða þessar tölur.

[Emil Hannes Valgeirsson, 13.4.2009 kl. 12:44]

Þessi framsetning er kannski sú einfaldasta til bera saman í fljótu bragði mörg ár í einu á meðan línurit eru betri til að skoða eða bera saman eitt ár eða einstök tímabil. Svo er þetta líka bara ágætis mósaíkmynstur sem gæti gert sig vel, t.d. sem eldhúsflísar.

En svo leiðir eitt af öðru sem kannski endar með því að ég taki fyrir heilu árin, bara til að sjá hvernig það lítur út. Ég hef þó grun um að sumarmánuðirnir verði miklu einsleitari í litum.

[Loftslag.is, 13.4.2009 kl. 16:32]

Tek undir ofangreind álit... skemmtileg framsetning - það væri líka gaman að sjá allt árið, svona upp á að skipuleggja sumarfríið

[Sigurður Þór Guðjónsson, 14.4.2009 kl. 09:13]

Tek undir með Sápiboxinu.