Mánaðarhitasúluritið að loknum nóvember

Það er varla hægt annað en að birta nýjustu uppfærslu á súlnaverkinu yfir meðalhita mánaðanna í Reykjavík eins og það lítur út nú að loknum þessum afar hlýja nóvembermánuði. Sem fyrr sýna bláu súlurnar meðalhita mánaðanna samkvæmt opinbera viðmiðunartímabilinu 1961-1990, rauðu súlurnar sýna meðalhita síðustu 10 ára og þær fjólubláu standa fyrir árið í ár. Nýliðinn nóvember var eins og þarna sést langt fyrir ofan meðaltöl mánaðarins og að auki nokkuð hlýrri en meðaltöl októbermánaðar. Það má segja að þessi nóvembersúla riðli þeirri fínu simmetríu sem komin var í myndina enda var þetta næst hlýjasti nóvember frá upphafi mælinga í Reykjavík (5,5°C), á eftir hinum ofurhlýja nóvember 1945 (6,1°C).

Staðan í árshitamálum fyrir Reykjavík er orðin athyglisverð og víkur þá sögunni að súlunum lengst til hægri sem standa fyrir árshita. Ef desember verður bara í kalda meðaltalinu (-0,2°C) þá endar meðalhiti ársins í 6,0 stigum og árið það næst hlýjasta frá upphafi. Ef desember hinsvegar hangir í 10 ára meðaltalinu (0,7 C°) þá endar meðalhitinn í 6,1 stigi sem er jafn hlýtt metárinu 2003, sem táknað er með grænni súlu. Stutt er þó í að árið verði það hlýjasta frá upphafi en samkvæmt mínum útreikningum þarf meðalhitinn nú í desember að ná 1,2°C til að svo megi verða.

Miðað við veðurspár er ekki mikilla hlýinda að vænta næstu daga þannig að best er að stilla öllum væntingum í hóf - hafi menn þá yfirleitt einhverjar væntingar. Sjálft meðalhitametið fyrir desember er varla í hættu en það er 4,5 °C frá árinu 2002. Hvað sem því líður er þó engin hætta á öðru en að árið 2014 verði eitt af allra hlýjustu árunum í Reykjavík sem og víðast hvar á landinu, að ógleymdu heimsmeðaltalinu því ársmeðalhitinn 2014 er við það allra hæsta á heimsvísu, hafi einhver áhuga á að vita það.

 

Athugasemdir

[Torfi Stefánsson (IP-tala skráð) 3.12.2014 kl. 06:57]

Athyglisvert! Líklegt er að metið falli fyrst ekki þarf nema 1,2 gráðu meðalhita í desembermánuði til þess. Að vísu er verið að spá einhverjum kulda framundan en ekki neinu verulegu kuldakasti svo það þarf lítið að hlýna eftir það, svo metið verði slegið!

Verst hvað þessum hlýindum er misskipt á mánuðina og koma á vitlausum tíma (eins og nú í nóvember og svo í janúar). Best væri auðvitað að fá hann um hásumarið en samkvæmt súluritinu náði júlí í ár ekki meðaltali síðustu tíu ára (reyndar sá eini á sumrinu).

[Emil Hannes Valgeirsson, 3.12.2014 kl. 10:52]

Þetta verður tæpt. En það eru þrír mögulekar í stöðunni og kannski álíka líklegir: að árið verði undir metinu frá 2003, að metið verði jafnað og að metið verði bætt.

[Gunnar Th. Gunnarsson, 4.12.2014 kl. 00:40]

Væri gaman að fá súlu fyrir 1930-60 í hópinn. Þessar þrjár eru of pólitískar fyrir minn smekk 

[Emil Hannes Valgeirsson, 4.12.2014 kl. 10:00]

Það er ekki gott ef hlýnunin lítur pólitískt út og einhver gæti sagt að hér sé um að ræða sérvalin gögn í þágu málstaðarins. En ég er til í að gera svona súlurit með 1930-60 meðaltalinu inná, ef það má vera eftir áramót. Þá verð ég  líka búinn að reikna út nýtt 10 ára meðaltal sem að vísu verður örlítið hærra en það núverandi.

Annars voru þessi tímabil valin sem viðmiðun til að spá fyrir um framhaldið á næstu mánuðum, þ.e. kalt tímabil og hlýtt tímabil. Auk þess er 1961-90 ennþá opinbert viðmiðunartímabil sem óviðeigandi er að sniðganga. 

[Torfi Stefánsson (IP-tala skráð) 5.12.2014 kl. 09:23]

Já, mikil er speki þín Emil!

Annars bakka ég með þetta um líkur á meti, enda er nú verið að spá hörkuvetri fram yfir miðjan mánuðinn. Svo var metkuldi í nótt, aðfararnótt föstudags. 

Kannski verða kuldametin slegin hvert af öðru þennan mánuðinn!?

[Emil Hannes Valgeirsson, 5.12.2014 kl. 10:02]

Já, það verður ólíklegra að árshitamet verði slegið eftir því sem spár ná lengra. Ég hef annars ekkert frétt af metkulda í nótt.

[Hilmar Hafsteinsson (IP-tala skráð) 6.12.2014 kl. 12:43]

Það er rétt að sefa áhyggjur Emils Hannesar Valgeirssonar með þeirri staðreynd að meðalhiti fyrstu viku desembermánaðar 2014 í Rvk er -0,2°C, en það er á pari við meðalhita í Rvk á kalda(!) tímabilinu 1961 - 1990.

Svo geta menn auðvitað látið sig dreyma um spilliblota og óðablota, að hætti Veðurstofu Íslands ;)

[Jóhann (IP-tala skráð) 6.12.2014 kl. 20:39]

Í ljósi þess að barnakennarinn hafnar öllum mælingum sem sýna hlýnun Jarðar, þykir mér auðsætt að þetta er bara einhver litilsigldur gaur að trolla.

[Hilmar Hafsteinsson (IP-tala skráð) 7.12.2014 kl. 12:30]

Það er auðvitað í sönnum anda óðahlýnunartrúboðsins að ráðast á manninn í stað þess að taka rökræðuna.

Éttu hann sjálfur Jói minn!

[Jóhann (IP-tala skráð) 7.12.2014 kl. 20:58]

Ætlar barnakennarinn nú að bera við minnisleysi?

Ég spurði þig sérstaklega að þessu.

Þú sagðist hafna mælingum sem sýna hlýnun hnattarins.

Vældu í spegilinn.

[Emil Hannes Valgeirsson, 7.12.2014 kl. 22:11]

Æ strákar, ég vil helst vera laus við svona umræðu hér.

[Torfi Stefánsson (IP-tala skráð) 7.12.2014 kl. 22:58]

Mesta frost á landinu aðfararnótt föstudagsins var 17,8 stig í Árnesi. Það þykir nú nokkuð gott - og mér skilst að ekki hafi verið kaldara á landinu á þessu ári.
Býst reyndar við að nóttin í nótt (aðfarnótt mánudags) verði enn kaldari.

[Emil Hannes Valgeirsson, 7.12.2014 kl. 23:34]

Þú ert kannski að vísa í þessa Mbl frétt frá 5. des: http://www.mbl.is/frettir/innlent/2014/12/05/17_8_stiga_frost_i_arnesi/

„-17,8 stiga frost mældist í Árnesi um sjöleytið í morgun og er það minnsti hiti sem mælst hefur á landinu frá miðnætti.“

Þetta er frekar illa orðað og gæti misskilist. Minnsta frostið í byggð í ár er sennilega -28 stig við Mývatn 18. febrúar. Báðir þessir staðir er kuldapollar í froststillum. Sjáum svo til með harðara frost.

[Torfi Stefánsson (IP-tala skráð) 8.12.2014 kl. 10:51]

Takk fyrir þetta Emil! Sem sé ekki kaldasta nóttin.
Það var svo reyndar ekki eins kalt í nótt og á aðfararnótt föstudagsins, "aðeins" 15 stiga frost í Stafholtsey. En metið fjarlægist æ meir. Kannski verður desember kaldasti mánuðurinn nú í lengri tíma (að vísu var hann harla kaldur fyrir tveimur árum).

[Hilmar Hafsteinsson (IP-tala skráð) 8.12.2014 kl. 17:11]

Af gefnu tilefni Emil Hannes Valgeirsson. Hér er nokkuð skýr lýsing á honum Jóhanni, kunningja þínum og óðahlýnunarsinna:

"Geturðu ekki látið manninn í friði Jóhann, farið í meðferð hjá sálfræðingi og haldið áfram að lifa þínu eigin lífi, frekar en öfundast og hatast út í ágætis mann sem er engum að gera mein? Það leysir ekki þín vandamál eða gerir þitt líf betra, þetta pólítíska ofstæki þitt sem veldur því þú, sem ofsækismaður, getur ekki unnt öðrum að hafa aðrar skoðanir, heldur finnur þig knúinn til að ofsækja þá og rægja, og reyna að mannorðsmyrða þá ef þú getur, að fanatíkera sið, svo talibanar væru meira að segja stolltir af ofstækinu. Maðurinn er alla vega ekki með persónuárásir." R (IP-tala skráð) 6.7.2012 kl. 00:58

[Emil Hannes Valgeirsson, 8.12.2014 kl. 18:48]

Ekki er hann kunningi minn svo ég viti.