Ísland á 10. bestu myndinni frá NASA Earth Observatory

Ein af mínum uppáhalds síðum á netinu er á vegum NASA þar sem sjá má daglega nýjar gervitunglamyndir af ýmsum fyrirbærum á jörðinni. Vefsíðan, sem nefnist Earth Observatory, fagnaði 10 á afmæli sínu núna þann 29. apríl  og í tilefni af því hafa þeir birt 10 bestu myndirnar sem þar hafa birst að mati heimsækjenda, allt mjög flottar myndir að sjálfsögðu.

Það sem er svo ánægjulegast er að Ísland kemur við sögu í þeirri mynd sem lenti í 10. sæti (sjá hér að neðan) og því er komið ærið tilefni til bloggfærslu hér á síðunni sem aðallega reynir að fjalla um himinn og jörð.

Fyrst er þó sjálfsagt að nefna myndina sem lenti í 1. sæti en það er myndin af Satúrnusi hér að ofan, tekin af Cassini geimfari þann 15. september 2006. Á myndinni sjást hringir reikistjörnunnar fallega uppljómaðir vegna þess að sólin er á bakvið Satúrnus frá þessu sjónarhorni og lýsir því hringina aftanfrá. Myndin hefur fengið að vera með í keppninni vegna þess að jörðin er þarna, pínulítil rétt fyrir utan hringina og sést bara þegar myndin er stækkuð upp.

Þær myndir sem lentu í 2.-10. sæti má svo sjá hér að neðan. Meðal mynda þar er t.d. athyglisverð mynd af suðurljósum séð úr geimnum og næturljósamyndin fræga af jörðinni sem hefur birst víða. Ég birti þær bara litlar hér en þær eru allar betur tíundaðar á Earth Observatory síðunni. (sjá hér)

 

Í 8. sæti vekur athygli mína myndaröð frá maí 2006 sem heitirAgricultural Patterns, en ég gerði einmitt sjálfur mjög svipaðamyndaseríu á dögunum sem heitir Landbúnaðarmynstur, en hafði þó ekkiséð þessa.

Svo að lokum skal nefna Íslandsmyndina sem lenti í 10. sæti en það er mynd af tveimur fallegum lægðarsveipum nálægt Íslandi en sú mynd var tekin þann 20. nóvember 2006. Daginn áður en þessi mynd var tekinn gerði mikið hríðarveður í Reykjavík með mikilli ófærð og vandræðagangi sem er frekar óvenjulegt í nóvembermánuði, allavega á nú á seinni árum. Fannfergið var mjög staðbundið hér í borginni og ekkert snjóaði á Suðurlandsundirlendinu og í Borgarfirði. (Nánar um myndina hér).

 

 

Athugasemdir

[Kalli (IP-tala skráð) 30.4.2009 kl. 16:25]

Þetta lægðamynstur mynnir á fjármagnsflutningana og hvernig milljarðarnir voru sogaðir frá landinu!

[Illugi Jökulsson (IP-tala skráð) 1.5.2009 kl. 15:06]

Sæll Emil. Frábær mynd. Ég og vinur minn SKAKKI TURNINN birtum Íslandsmyndina umsvifalaust á Facebook-síðum vorum. En annað sem ég var að lesa á á síðunni þinni varð til þess að mér datt í hug að leita aðstoðar hjá þér varðandi svolítið - mundirðu nenna að skrifa mér á [e-mail] og gefa mér upp netfáng svo ég geti skrifað?

[Kjartan Pétur Sigurðsson, 1.5.2009 kl. 15:19]

Flottar myndir og þá sérstaklega þróunin á landbúnaðarmynstrinu.

[Malína (IP-tala skráð) 2.5.2009 kl. 00:01]

Ha ha, tek undir mað Kalla.  Neðsta myndin sýnir greinilega peningasogið frá landinu.  Glittir ekki þarna í Jásgeir og nokkur seðlabúnt í neðra soginu?

Frábærar myndir!

[Emil Hannes Valgeirsson, 2.5.2009 kl. 00:34]

Allt sem ég birti hér á blogginu er auðvitað ekkert annað en lævís og útsmogin þjóðfélagsádeila sem hefur ekkert með náttúruna að gera. Sumir eru greinilega farnir að átta sig á því.