Veðrið klukkan 18

Hér áður fyrr, eða þar til fyrir svona 10 árum, voru á hverjum degi fluttar veðurfregnir á Rás1 klukkan 18.45 beint frá Veðurstofu Íslands. Þetta var hefðbundinn veðurfréttatími sem innihélt bæði veðurlýsingu fyrir einstaka staði á öllu landinu og næsta nágrenni svo sem Angmagssalik og Þórshöfn í Færeyjum auk nokkurra skipa á siglingu. Síðan var greint frá hámarkshita á landinu og í Reykjavík, einnig mesta úrkoma á landinu og úrkomumagn í Reykjavík yfir daginn. Eftir þessari upptalningu fylgdi svo veðurspá fyrir landið og miðin ásamt langtímaspá. Eins og allir geta séð var þetta úrvalsútvarpsefni svona rétt fyrir kvöldfréttir Útvarps sem þá voru klukkan 19.00. Þarna fékk þjóðin helstu staðreyndir um veður dagsins á meðan gert var klárt fyrir kvöldmatinn sem auðvitað var alltaf klukkan sjö á öllum góðum heimilum. Þjóðin gekk svo að snæðingi alveg með það á hreinu hvar á landinu hafði viðrað best eða rignt mest og það sem kannski skipti mestu máli hvort heitara hafi verið á Akureyri eða í Reykjavík.

Veðurfréttatíma eins og þennan má enn heyra á morgnana fyrir 10-fréttir á Rás1 nema þar segir af lágmarkshita og úrkomu næturinnar sem eru ekki eins „heitar fréttir“ og veðrið yfir daginn. Veðurfréttatíminn góði klukkan 18.45 hvarf hins vegar bara sisvona einn daginn þegar kvöldfréttir RÚV voru færðar til klukkan 18.00 og komu aldrei aftur. Þetta var ekki síst missir fyrir mig þar sem ég skráði niður veðrið í Reykjavík og geri enn. Það var fastur liður að koma sér fyrir við viðtækið áður en klukkan varð 18.45 til að missa ekki af veðurlýsingunni fyrir Reykjavík.

Í dag er það þannig að það er eins og Ríkisfjölmiðlarnir vilji helst ekki láta fólk vita hvernig veðrið hefur verið á landinu enda var ekkert gert til að bæta fyrir þessar töpuðu veðurupplýsingar. Í veðurfréttum Ríkissjónvarpsins virðist veður dagsins einnig vera leyndarmál því þar er ekki einu sinni sýnt veðurkort fyrir veður dagsins á landinu nema í mýflugumynd á stóra Atlantshafskortinu. Veðurfegnir í dag byggjast því nær eingöngu á veðurspám og þá gjarnan teknir fyrir svo margir dagar að enginn man í rauninni veðurspána fyrir morgundaginn. Mig langar einhvertíma að rýna betur í sjónvarpsveðurfréttirnar en veðurfréttatímann góða klukkan 18.45 vil ég gjarnan fá aftur. Á RÚV er annars á þeim tíma hinn ágæti Spegilsþáttur, en sá þáttur þarf ekkert að standa lengur en til 18.45 enda er þar eiginlega ekkert annað en krepputal sem er hvorki gott fyrir matarlistina né meltinguna.

Athugasemdir

[Lára Hanna Einarsdóttir, 8.9.2009 kl. 02:03]

Við lestur þessa pistils upplifði ég nostalgíu og fékk hláturskast - hvort tveggja jákvætt og skemmtilegt. Takk.

[Hörður Þórðarson, 8.9.2009 kl. 09:18]

Ekki veit ég hvað hinum almenna notanda finnst en mér finnst að sjónvarpsveðurfregnum hafi farið aftur. Þar hefur átt sér stað "dumbing down" sem ég kann ekki alveg að þýða yfir á íslenski, kannski niður heimskun, niður þumbun eða eitthvað slíkt.

Það sem ég sé mest eftir er að það vantar öll skil inn á kortin. Staða hæða, lægða og skila er algert grundvallaratriði. Fyrir þá sem skilja yfirleitt hvað hita, kulda og samskil eru, þá  gefa hreyfingar þeirra og staða ómetanlega vitneskju og innsýn um veðurkerfin. Ég get ekki skilið hvers vegna skilin hafa verið felld út af kortunum. Hefur almenningur frábeðið sér að sjá þetta? Er of erfitt fyrir veðurfæðinga að greina stöðuna? Vonandi getur einhver sem veit betur en ég sem vinn ekki hjá VÍ upplýst þetta.

Þar að auki væri líka gaman að fá að vita hvar á vef VÍ er hægt að sjá almennilega greiningu á Norður Atlandshafinu. Ég fór að leita en það eina sem ég fann var þetta:

http://www.vedur.is/vedur/flugvedur/greining/atlants/ 

Þetta kallar VÍ "greiningarkort". Þetta er ekki greiningarkort fyrir fimm aura, það eru engin skil á þessu. Þetta er greingarkort:

http://www.metservice.co.nz/public/maps/tasman-sea-nz-colour-latest.html

Að lokum, ef einhver gæti sagt mér hvar á vef VÍ ég get fundið kort sem sýna áætlaða stöðu skila og lægða í framtíðinni að mati veðurfæðings, þá yrði ég þakklátur. Þá er ég ekki að tala um hrátt þrystisvið sem eitthvað eitt líkan hefur spýtt út úr sér, heldur eitthvað þessu líkt:

http://www.metservice.co.nz/public/maps/tasman-sea-nz-future-colour-18h.html

[Emil Hannes Valgeirsson, 8.9.2009 kl. 11:13]

Alveg sammála þér Hörður því ég sakna einmitt skilanna. Veðurfregnir í dag stuðla líka að algeru veðurólæsi og skilningi á veðurkerfunum meðal almennings. Þetta var öðruvísi þegar þú varst í þessu.

Ég stóðst annars ekki mátið og fór í nostalgíugírinn í pistlinum. En auðvitað fylgir þessu létta nöldri full alvara.

[Sigurður Þór Guðjónsson, 8.9.2009 kl. 16:58]

Tek undir það að sjónvarpsveðurfregnum hefur farið aftur. Mér finnst líka að Veðurstofan hafi ekki átt að taka það í mál að sleppa veðrinu kl. 18 sem ekki hefði gerst ef hún hefði veitt meiri mótspyrnu á sínum tíma. Það kemur sér sérlega illa fyrir þá sem ekki geta nálgast tölvur, t.d. ef fólk er á ferðalögum, liggur á sjúkrahúsum eða er sjóndapurt. Til að nefna bara eitthvað. Uppgjör dags og nætur  um veður er svo hreinlega að hverfa úr íslenskum fjölmiðlum. Það síðasta er að jafnvel yfirlit Veðurstofunnar á sínum vef hefur ekki birst í marga daga - án nokkurra skýringa. Um þetta var ég að blogga um daginn. Hvað skilakort varðar er að minnsta kosti hægt að sjá þetta. Annars skilt mér að það séu deildar meiningar meðal veðurfræðinga um gagnsemi þess að teikna skil inn á kort.

[Sigurður Þór Guðjónsson, 8.9.2009 kl. 16:59]

Btw: Afhverju fékk Lára Hanna hláturskast?

[Sigurður Þór Guðjónsson, 8.9.2009 kl. 17:26]

Eitthvað misfórst þessi vísun á veðurkort af Atlantshafi hjá mér en hún a.m.k. finnst á síðunni sem ég vísaði á. Svona upp á nostalgíuna: Veðrið kl. 18 var síðast lesið í útvarpið 16. maí 2004.

[Emil Hannes Valgeirsson, 8.9.2009 kl. 20:02]

Mér fannst vera lengra síðan veðrið kl. 18 var lesið í útvarpið. Nema það hafi þá verið á öðrum tíma en 18.45.

Gagnsemi þess að sýna skil byggist sjálfsagt á því hvort fólk skilji hvað þau sýna. Margir munu eflaust aldrei fatta það, en fyrir þá sem skilja skil held ég að gagnsemin sé ótvíræð.

[Sigurður Þór Guðjónsson, 9.9.2009 kl. 00:10]

Já, í einhvern tíma var veðrið lesið klukkan hálf átta áður en það hætti alveg þennan dag.

[Emil Hannes Valgeirsson, 9.9.2009 kl. 00:19]

Þetta rifjaðist upp. Veðurfréttatíminn í útvarpinu var kominn á sama tíma og sjónvarpsveðurfréttir.

[Kama Sutra, 10.9.2009 kl. 19:56]

Ég er mjög skilningsrík á hláturskastið hennar Láru Hönnu.

Stundum eru veðurnördarnir fyndnustu menn landsins.

[Emil Hannes Valgeirsson, 10.9.2009 kl. 20:20]

Veðurnöldur veðurnörda er kannski bara hin besta skemmtun.

[Sigurður Þór Guðjónsson, 10.9.2009 kl. 23:02]

Veðurnördarnir eru vitrustu menn landsins. Og ekki til að spauga með!

[Kama Sutra, 11.9.2009 kl. 09:04]

 

[Lára Hanna Einarsdóttir, 13.9.2009 kl. 21:35]

Ég fékk nú bara hláturskast af því mér fannst þetta svo skemmtilega skrifað og fram sett hjá Emil.

Mér finnst veðurfræði, veðurspár og allt í kringum veður mjög áhugavert og gleypi í mig pistlana þeirra Emils, Sigurðar Þórs og Einars. Ekki er verra að allir hafa þeir húmor sem laumast inn hér og hvar í veðurpistlunum.