Háfíslágmark númer tvö

Þeir hjá Bandarísku hafísrannsóknarstofnuninni voru heldur fljótir á sér að lýsa því yfir að hafíslágmarki ársins hafi verið náð þann 10. september þegar útbreiðslan var komin niður í 4,76 milljón km2 og farin að aukast á ný dagana þar á eftir. En ísinn hefur sínar kenjar sem mönnum reynist stundum erfitt að ráða í. Síðustu daga hefur útbreiðsla íssins tekið nýja dýfu og er samkvæmt þessu línuriti komin nálægt lágmarki ársins 2008 sem var næst minnsta útbreiðsla íssins á eftir metárinu 2007. 

Línuritið sem er frá NSIDC (Bandarísku hafísrannsóknarstofnuninni) sýnir samanburð við síðustu ár nema að ég hef bætt við (í algjöru óleyfi) nýjustu upplýsingum ásamt viðmiðunarlínum og tölum og virðist útbreiðslan nú vera nálægt 4,6 millj. km2.

Trúlega mun ferillinn ekki fara neðar en þetta í ár en það sem aðallega olli þessari lokadýfu voru sterkir vindar sem mynduðust vegna samspils hæðar við norðurpólinn og lægðar við Síberíustrendur sem sjást þarna á kortinu frá 16. september, en þar sem vindurinn blés frá opnu hafssvæði inn á ísbreiðuna hlaut ísinn að hrekjast undan og þéttast. Myndin er fengin af Wetterzentrale.de og enn er ég að bæta við upplýsingum (H og L). Nú mun allt vera með kyrrum kjörum þarna norðurfrá og Norður-Íshafið fær væntanlega frið til að frjósa saman á ný enda nýtur varla nokkurs sólarhita þarna lengur.

Í síðustu færslu fjallaði ég einnig um hafísinn og var þar með ýmsar vangaveltur um efasemdarmenn og áhyggjumenn sem má taka með hæfilegri alvöru. Þar nefndi ég líka að ég hefði haft smá trú á nýju lágmarki sem sem sagt hefur orðið raunin.

 

Ísinn bráðnar óvenju hratt

Athugasemdir

[Ágúst H Bjarnason, 20.9.2010 kl. 06:43]

Góðan dag Emil

Stundum eru menn heldur fljótir á sér...  Það getur verið varasamt eins og dæmin sanna.

Þessi magnaða mynd frá vetrinum 2007-2008 virðist sýna að hafstraumar og vindar geta átt stóran þátt í útbreiðslu hafíss.  

http://www.homerdixon.com/download/amsr-2_04.swf

 ( eða hér  )

Hugsanlega verða menn að fara varlega þegar ályktanir eru dregnar af hafíslágmarkinu á norðurslóðum í september hvers árs. Hve stóran þátt eiga lofthiti, vindar og hafstraumar?  

[Emil Hannes Valgeirsson, 20.9.2010 kl. 10:12]

Allt þetta spilar sjálfsagt inní Ágúst. Hafíslágmarkið merkilega árið 2007 kom ekki síst til vegna þess að þá voru allar veðuraðstæður óhagstæðar ísnum, en þar að auki var ísinn orðinn veikur fyrir vegna langtímahlýnunar. Síðustu ár hafa veðuraðstæður verið nær meðallagi og ekki stuðlað eins mikið að flutningi íssins suður um Fram sund. Ef lægð er til dæmis ríkjandi á norðurpólnum eins og var lengi í sumar þá dreifist úr ísnum en hann verður gisnari í staðinn.

Síðan er alltaf spurning hvað af þessari langtímahlýnun er náttúruleg, Norður Atlantshafið hefur verið í hlýjum fasa síðustu 10-15 ár og það hefur örugglega áhrif norður í Ísahaf, það gæti hinsvegar snúist við en þegar það gerist er spurning hvort ísnum verði viðbjargandi.

Í þessu sem mörgu öðru er best að fylgjast vel með en fara varlega í spádóma.

[Sveinn Atli Gunnarsson, 20.9.2010 kl. 11:03]

Ég held að tel það mjög hæpið að hægt sé að kenna vindum eða hafstraumum um þetta minnkandi leitni á hafíslágmarkinu á síðustu árum og áratugum. En það er alveg hárrétt að vindar og hafstraumar spila inní hvernig útbreiðslan er eftir mánuðum og árum, en til að ná þessari leitni í lágmarkinu sem hefur verið á undanförnum árum, þá er alveg ljóst í mínum huga að hlýnun jarðar hefur mikil áhrif þar á. Lágmörk síðustu ára eru það langt undir meðaltalinu að ekki er hægt að skýra það með óhagstæðum vindum eða hafstraumum einum saman, fyrir utan að rúmmál hafíssins fer minnkandi, sjá myndina hér undir (ef tekst að setja hana inn):

[img]http://www.loftslag.is/wp-content/uploads/2010/04/ArcticIceextent1953-2010.jpg[/img]

Sjá nánar, Er hafís Norðurskautsins að jafna sig?

[Emil Hannes Valgeirsson, 20.9.2010 kl. 22:57]

Því er við að bæta að útbreiðslan hefur haldið áfram að minnka samkvæmt línuriti NSDC fyrir 19. sept. Lágmarkið gæti verið að jafna lágmarkið frá 2008 sem var 4,52 millj. km3.

Sjáum til hvar þetta endar.